Հոգեբանները ուսումնասիրել են հարյուրավոր անիմացիոն ֆիլմեր և եզրակացրել, որ դրանցից մի քանիսը վտանգներ են պարունակում մանկական հոգեբանության ձևավորման տեսանկյունից:

zNews-ը խորհուրդ է տալիս զերծ պահել մանուկներին այդ ֆիլմերը դիտելուց:

Մաշան և արջը

Այս մուլտսերիալը բավականին որակյալ է և ուրախ սյուժե ունի: Փոքրիկները հաճույքով են դիտում այն, և հեռուստաալիքներն էլ, միմյանց հերթ չտալով, գնում են ֆիլմը ցուցադրելու իրավունքը: Հոգեբանները, սակայն, զգուշացնում են, որ ֆիլմի գլխավոր հերոսուհին տիպիկ հիպերակտիվ երեխա է՝ վառ արտահայտված ուշադրության պակասով: Մաշայի կերպարում դա դրսևորվում է քմահաճ պահվածքով և պահանջկոտությամբ. նա բարի և հնազանդ արջին բազմաթիվ տհաճություններ է պատճառում և խնդրահարույց վարք է դրսևորում: Արջը, որ ասոցացվում է մեծահասակի հետ, չի պատժում նրան, այլ համբերատար հանդուրժում է աղջկա պահվածքը: Շատ ծնողներ բողոքում են, որ երեխաները ընդօրինակում են Մաշայի պահվածքը:

Հրեշների դպրոցը

Մուլտֆիլմը սարսափելի առասպելական կերպարներին դարձնում է անվնաս և դուրեկան՝ բերելով նրանց երեխաների համար հասկանալի դպրոցական աշխարհ: Այդ ամենով հանդերձ՝ հերոսների պահվածքը բացասական օրինակ է դառնում նրանց համար: Ֆիլմում ժխտվում է կրթության կարևորությունը, և խրախուսվում է մեծերին հակադրվելը: Ավելին, երեխաներին դուր գալու համար հերոսների խոսքը դուրս է թույլատրելիության սահմաններից, իսկ նրանց կատակները միանգամայն անթույլատրելի են: Հերոսները եսասեր են, նրանց հետաքրքրում է միայն իրենց արտաքինը և մյուսների հետ հարաբերությունները:

Բոբ սպունգը

Այս մուլտֆիլմը շատ տարածված է թե փոքրիկների, թե ավելի մեծ տարիքի երեխաների շրջանում: Եթե մեծերը կարող են հասկանալ ֆիլմի անհեթեթ հումորը և հերոսների ոչ ադեկվատ պահվածքը, ապա փոքրիկները դա ընդունում են որպես բնականոն երևույթ: Օրինակ՝ Բոբ սպունգը և Պատրիկը անընդհատ քննադատում են մեծերին և ծաղրում նրանց, ուտում են ոչ պիտանի բաներ, վնասում են իրենց և ուրիշներին:

Թոմը և Ջերին

Ամերիկյան դասական անիմացիայի չհնացող այս նմուշը ծայրից ծայր հեղեղված է ագրեսիայով: Հերոսները անընդհատ վնասներ են հասցնում միմյանց, և դա մատուցվում է ծիծաղելի կատակների տեսքով: Նրանց արարքները անպատիժ են մնում: Դարձյալ մեծ տարիքի երեխաները կարող են ընկալել հումորը, բայց փոքրիկների համար այն բնականոն երևույթ է համարվում:

Նյութը հրապարակման պատրաստեց zNews-ը

Տեղեկացրե՛ք Ձեր մտերիմներին