Կա գործող կարծրատիպ, որ բոլոր շիկահերները հիմար են, ու այս կարծրատիպը ստիպում է մինչև օրս թերահավատորեն մոտենալ շիկահեր կանանց, ովքեր չգիտեն էլ, թե ինչպես փոխեն իրենց մասին գործող պատկերացումներն ու կոտրեն բոլոր կարծարտիպերը։ Սակայն որտեղի՞ց է եկել այն մտածելակերպը, թե բոլոր շիկահեր կանայք հիմար են.
zNews-ը առաջարկում է ծանոթանալ այս կարծրատիպի առաջացման պատմությանը։
Ամեն ինչ սկսվեց հոլիվուդյան համր ֆիլմերից, որտեղ մեծամասամբ խաղում էին շիկահեր կանայք, ովքեր էլ հենց ստեղծեցին պատկերացումը, թե շիկահեր կանայք հիմար են ու ոչինչ չեն հասկանում։ Սակայն պատմությունը այդքան հեշտ չէ, որքան կարող է թվալ առաջին հայացքից։
Քանի որ հոլիվուդյան համր ֆիլմերում հիմնականում խաղում էին շիկահերներ, նրանց սկսեցին անվանել «dumb», որը անգլերենից թարգմանաբար նշանակում է «համր»։ Ինչո՞ւ էին հիմնականում շիկահերներ խաղում համր ֆիլմերում։ Կար պատկերացում, որ շիկահերներն անգամ առանց խոսքի կարող են գրավել հանդիսատեսին ու տղամարդկանց, քանի որ նրանց արտաքինն արդեն գրավիչ է։ Ու քանի որ ԱՄՆ-ում «dumb» բառը ավելի շատ հասկանում էին անխելք, հիմար իմաստով, այս արտահայտությունը սկսեց հասկացվել այնպես, թե իբր շիկահերները հիմար են, որտեղից էլ և առաջացած կարծրատիպը տարածվեց ամբողջ աշխարհով մեկ։
Արտահայտությունը սկսեց ԱՄՆ-ում տարածվել 1920-ական թվականներից, սակայն մինչ օրս չի կորցնում իր արդիականությունը։ Արտահայտությունն ավելի սկսեց ամրապնդվել Անիտա Լուսի «Ջենտլմենները նախընտրում են շիկահերներին» գրքում, որտեղ, սակայն, «հիմար շիկահեր» արտահայտությունը հերոսներն այդպես էլ իրենց թույլ չէին տալիս, քանի որ դա համարվում էր չափազանց վիրավորական։
Առաջին կինն, ով աշխարհին հայտնի է որպես «հիմար շիկահերի» համբավ ունեցող համաշխարհային աստղ, Մերիլին Մոնրոն է։ Նրա մասին լուրերը, թե իբր դերասանուհին չի առանձնանում իր խելքով, սկսեցին արագ տարածվել աշխարհով մեկ, սակայն իրականում Մոնրոյի կերպարի հետևում բավականին մտածված քայլ էր, որը փոխելու էր դերասանուհու կյանքը։
Նա տիպիկ սևահեր էր, երբ փոխեց մազերի գույնն ու որոշեց, որ պետք է այսուհետ շիկահեր լինի։ Մոնրոն շատ լավ էր հասկանում, որ այդ տարիներին ԱՄՆ-ում շիկահերների վրա բավականին շատ են կենտրոնացած, ու նա կարողացավ շատ ճիշտ ձևով օգտագործել այդ կենտրոնացումը։ Արդյունքում դերասանուհին դարձավ ամենահայտնի շիկահեր դեմքերից, ում ասոցացնում էին հիմարիկության հետ, սակայն միևնույն ժամանակ սիրում հենց դրա համար։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
