Ճարպակալումն ուղղակիորեն ազդում է աղջիկների սեռական հասունացման վրա, նախազգուշացնում են Էկոլոգիական բժշկության ազգային ինստիտուտի (ԱՄՆ) մասնագետները:

Նախկինում անցկացված հետազոտությունները ցույց են տվել, որ ճարպակալմամբ աղջիկների շրջանում սեռական հասունացումը եւ առաջին դաշտանը ավելի վաղ են սկսվում, քան նորմալ քաշով աղջիկների դեպքում է, փոխանցում է News-medical.net-ը:

Իսկ նոր հետազոտությունը ցույց է տվել, որ օրգանիզմում ճարպի մեծ պարունակությամբ աղջիկների մոտ սեռական հասունացման շրջանի կեսին եւ վերջում դիտվել են որոշ վերարատադրողական հորմոնների ավելի բարձր մակարդակներ, ներառյալ ֆոլիկուլախթանող հորմոնը, ինհիբին B-ն եւ արական հորմոնները, ինչպես, օրինակ, տեստոստերոնը:

Ճարպակալմամբ որոշ աղջիկների մոտ տեստոստերոնի առավել բարձր մակարդակը կապված է անկանոն դաշտանային ցիկլի, ակնեի եւ մարմնի վրա մեծ քանակությամբ մազի առկայության հետ:

Դրանից բացի, սեռական հասունացման շրջանի վերջում ավելորդ քաշի ֆոնին գրանցվել են կրծքի զարգացման հապաղումներ եւ դաշտանի ավելի վաղ սկիզբ:

Իսկ ահա ձվարանների եւ արգանդի վիճակի վրա ավելորդ քաշը չի ազդել: Այսպիսին են 8-15 տարեկան 90 աղջիկների չորսամյա հետազոտության արդյունքներով կատարված եզրակացությունները: 36 աղջիկ տառապել է ճարպակալմամբ, 54-ն ունեցել է նորմալ քաշ:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ