Երբ երեխայի մարմնի ջերմաստիճանը կտրուկ բարձրանում է, ծնողներն անհանգստանում են ու փորձում են հնարավորինս արագ իջեցնել այն, սակայն նման դեպքերում հարկ է հիշել, որ բարձր ջերմությունը վկայում է մանրէների դեմ օրգանիզմի պայքարելու մասին:
Երեխայի ջերմության բարձրացման դեպքում մասնագետները խորհուրդ են տալիս ուշադրությունը կենտրոնացնել երեխայի ինքնազգացողության վրա, այլ ոչ թե ջերմաչափի:
Պետք չէ փորձել իջեցնել ջերմությունը, եթե երեխային այն չի անհանգստացնում և նա չի հրաժարվում սննդից ու խաղերից:
Հաճախ բարձր ջերմության դեպքում վատանում է երեխայի ախորժակը և նա հրաժարվում է սննդից:
Նման դեպքերում խորհուրդ չի տրվում ստիպողաբար կերակրել փոքրիկին, սակայն եթե նա չի հրաժերվում սննդից, ապա հարկավոր է տալ միայն առողջարար մթերք:
Հարկ է հիշել, որ քաղցած լինելու դեպքում երեխայի օրգանիզմն ավելի վատ է պայքարում վարակների դեմ:
Բացի այդ, բարձր ջերմությունը հաճախ հանգեցնում է առատ քրտնարտադրության, ինչը նշանակում է, որ օրգանիզմը կորցնում է անհրաժեշտ խոնավությունը: Նման դեպքերում օրգանիզմի ջրազրկումից խուսափելու համար հարկավոր է երեխային հաճախ որևէ խմելու բան տալ: Ընդ որում՝ լավագույն տարբերակը մաքուր ջուրն է: Եթե բարձր ջերմությունն ուղեկցվում է փսխումով ու փորլուծությամբ, ապա հարկավոր է երեխային հատուկ լուծույթ տալ, որի պատրաստման համար անհրաժեշտ է 1 լիտր ջրում 60 գրամ շաքար ու ½ թեյի գդալ աղ լուծել:
Մարմնի ջերմաստիճանի բարձրացման դեպքում մարդիկ հաճախ փորձում են երեխային ծածկել որևէ տաք բանով, մինչդեռ փոքրիկը ցանկանում է ազատվել ավելորդ հագուստից ու հովանալ: Նման դեպքերում պետք չէ դիմել ծայրահեղ քայլերին, քանի որ փոքրիկի համար վտանգավոր կլինի ինչպես բարձր ջերմաստիճանը, այնպես էլ ցածրը:
Եթե երեխան սրտխառնոցի պատճառով չի կարողանում դեղորայք ընդունել, սակայն բարձր ջերմությունը հարկավոր է իջեցնել, ապա կարելի է վաննայի մեջ 3-5 սմ սենյակային ջերմաստիճանի ջուր լցնել, երեխային պառկեցնել այդ ջրի մեջ, այնուհետև խոնավ սրբիչով շփել նրա ամբողջ մարմինը:
Զգուշացում. Ցանկացած առողջական խնդրի դեպքում դիմեք բժշկի, մի զբաղվեք ինքնաբուժությամբ: Ժողովրդական միջոցներ կիրառելուց առաջ խորհրդակցեք մասնագետի հետ, այլապես կարող եք վնասել ձեր առողջությունը: