Ռուսաստանցի միլիարդատեր Ռոման Աբրամովիչը, որը հաշտատարի դեր է ստանձնել ռուս-ուկրաինական հարաբերություններում, Ուկրաինայի նախագահ Վլադիմիր Զելենսկիից ձեռագիր գրություն է փոխանցել ՌԴ նախագահ Վլադիմիր Պուտինին:
Ինչպես գրում է Daily Mail-ը, այդ գրության մեջ եղել են խաղաղության հաստատման համար ուկրաինական կողմի պայմանները: Ըստ բրիտանական պարբերականի՝ Պուտինը «կատաղել է ստանալով այդ գրությունը»:
Նշվում է, որ Աբրամովիչը հանդիպել է Պուտինին ու փոխանցել գրությունը, որից հետո, Times-ի տեղեկություններով, ՌԴ նախագահն ասել է.«Ասա նրան, որ ես կջարդեմ նրանց»:
Դրանից հետո, ըստ հրապարակման, Աբրամովիչը վերադարձել է Ստամբուլ ու կապ հաստատել ուկրաինացի քաղաքական գործիչ Ռուստեմ Ումերովի հետ, որը հանդես է գանիս որպես բանակցող:
Նրանց հանդիպումը կազմակերպել է Թուրքիայի նախագահի խոսնակ Իբրահիմ Քալընը՝ Ստամբուլի հինգաստղանի հյուրանոցներից մեկում:
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին: Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
