Հրետակոծությունն ու հրաձգությունը Ստեփանակերտի շրջակայքում դադարել են։ Այս մասին «Արմենպրես»-ի թղթակցի հետ զրույցում տեղեկացրեց լրագրող, Ստեփանակերտի բնակչուհի Գայանե Գևորգյանը՝ հավելելով, որ ժամը 13։00-ից հետո հրետակոծություն կամ հրաձգություն լսելի չէ։
«Մարդիկ առայժմ վարանում են դուրս գալ ապաստարաններից, միայն մի մասն է ուղղակի դրսում կանգնել, այսպես ասած՝ մաքուր օդ շնչելու համար»,-հավելեց Գևորգյանը։
Նա պատմեց նաև, որ սեպտեմբերի 19-ի երեկոյան իրենց տան հարակից տարածքում արկ է ընկել, և, բարեբախտաբար, կարողացել են փրկվել։ Վնասվել է միայն տունը, որից հետո երեխաների հետ պատսպարվել են համեմատաբար ապահով մեկ այլ առանձնատան նկուղում։
Սեպտեմբերի 19-ին Ադրբեջանը Լեռնային Ղարաբաղում սկսել է լայնածավալ ռազմական գործողություններ։ Բազմաթիվ ավերածություններից ու մարդկային կորուստներից հետո Լեռնային Ղարաբաղում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն է ձեռք բերվել սեպտեմբերի 20-ի ժամը 13:00-ից ռազմական գործողությունների ամբողջական դադարեցման մասին։ Արցախի նախագահի աշխատակազմը նաև տեղեկացրել էր, որ ԼՂ և Ադրբեջանի իշխանությունների ներկայացուցիչների միջև հանդիպում է ծրագրված սեպտեմբերի 21-ին Եվլախում։
Ստեփանակերտի բնակելի թաղամասից տեսանյութ է հրապարակել Արցախի հեռուստաընկերությունը:
Լրագրողի հետ զրույցում բնակիչներից մեկը պատմել, թե որտեղ է եղել կրակոցների պահին.
«Տրաքացրին, ծուխ ու մութ էր: Աչքերս բռնվեցին, բռնվելով դուրս եկա: Առաջին հարկում է մեր տունը, պատուհանները բացեցի: Ինչ անենք, ահավոր վիճակ է»:
Հեռուստաընկերության կադրերում երևում է, թե ինչպես են ավերվել բնակելի շենքերը, վնասվել բակերում կանգնած ավտոմեքենաները:
