Արդյո՞ք խնձորները կօգնեն ձեզ նիհարել և որո՞նք են ավելի առողջարար՝ կարմիրները, թե կանաչները:

Մեզ քաջածանոթ մրգի մասին ՌԻԱ Նովոստիին պատմել է Դիետոլոգ Օլգա Կորաբլեւան։

Թարմ կամ եփած խնձորների կալորիականությունը չափազանց ցածր է։ Սակայն չորացրած մրգերը կամ խնձորի կոմպոտը, որոնց շաքարավազ է ավելացվում, այլեւս դիետիկ սնունդ չի կարելի համարել։ Ի դեպ, եփած խնձորները նպաստում են ճարպային մթերքների ավելի արագ մարսմանը։ Բացի այդ, դրանց մեջ պահպանվում է պեկտինը: Այն բարենպաստ ազդեցություն է ունենում աղիքների վրա։ Բայց քաղցր սորտերի խնձորներից դիաբետիկները և ավելորդ քաշ ունեցողները պետք է հրաժարվեն:

Կարմի՞ր, թե՞ կանաչ.

Մրգի մեջ օգտակար սննդանյութերի պարունակությունն ուղղակիորեն կախված է գույնից։ Կարմիր և դեղին խնձորներն ավելի շատ կարոտին ունեն (կարևոր է բջիջների առողջության և տեսողության համար), մինչդեռ կանաչ խնձորներն ավելի շատ երկաթ են պարունակում։

Մեկ խնձորը պարունակում է ասկորբինաթթվի օրական պահանջի 25%-ը։ 5-6 կորիզներում՝ յոդի օրական նորմա։ Այս միրգը պարունակում է նաև մագնեզիում, կալիում, C, A վիտամիններ։ Մասնագետը խորհուրդ է տալիս օրական մինչև երկու խնձոր ուտել։ Սա միանգամայն բավարար է, որպեսզի մարմինը ստանա անհրաժեշտ վիտամիններն ու հանքանյութերը՝ առանց առողջությանը վտանգելու։

Դիետոլոգը զգուշացնում է, որ դատարկ ստամոքսին խնձորը կարող է առաջացնել փքվածություն և աղեստամոքսային տրակտի հիվանդությունների սրացում (գաստրիտ, ստամոքսի խոց, աղիքներ)։ Եվ միայն բացարձակապես առողջ մարդիկ կարող են դիմել խնձորի մոդայիկ մոնոդիետաների, որոնք չպետք է տեւեն մեկ օրից ավելի։ Կիտրոնաթթուն, գինեթթուն և խնձորաթթուն, որոնք առկա են խնձորի մեջ, կարող են առաջացնել լեղապարկի բորբոքում։

Նյութը հրապարակման պատրաստեց zNews-ը

Կիսվե՛ք Ձեր ընկերների հետ