9 անձից բաղկացած ընտանիքը Հայաստան է հասել Արցախի Մարտունի քաղաքից: Արեգան երկրորդ անգամ է Գյումրիում. 2020 թ. պատերազմի ժամանակ, երբ տեղահանվել էին Արցախից, ծննդաբերել է Գյումրիում: Պատերազմից հետո որոշեցին վերադառնալ տուն: Ընտանիքը Մարտունիում զբաղվել է հողագործությամբ, ունեցել են ջերմոցներ:
Ասում են՝ պատերազմից մի քանի օր առաջ իրենք արդեն գիտեին, որ կռիվ է լինելու: Բոլորն են Արցախում խոսել այդ մասին: Հրետակոծության ժամանակ տանն են եղել, արագ իջել են նկուղ: Ծնողները գիշերներն արթուն հերթապահել են տանը, որ ադրբեջանցիները չմտնեն: Իսկ անհաջող փորձեր եղել են, որոնք կանխել են մեր զինծառայողները: Բայց տեղահանման հաջորդ օրն արդեն ադրբեջանցիները մտել են գյուղ:
Տնից հասցրել են վերցնել հագուստ, մնացածն այրել են: Գյումրիին արդեն ծանոթ լինելով՝ որոշել են բնակվել այնտեղ: Գյումրեցիների բարեհամբույր, հոգատար վերաբերմունքը շատ են նմանեցնում մարտունեցիներին, դրա համար մտածում են, որ այստեղ հեշտ կլինի:
Ընտանիքի փոքրիկն արդեն հաճախում է մանկապարտեզ, մորաքույրն ընդունվել է աշխատանքի: Փոքրիկ Ռոբերտը Մարտունիից բերել է իր տանկը, իսկ ծնողները՝ ամենաթանկը՝ մի բուռ հող Արցախից:
Աղբյուրը՝ GalaTV