Հայ Ամերիկյան Առողջության Կենտրոնի սեքսապաթոլոգ, դոցենտ Սևադա Հակոբյանն անդրադարձել է հղիության պլանավորմանը՝ նշելով, թե քանի օր առաջ է հարկավոր խուսափել վնասակար սովորություններից հղությունը պլանավորելիս․
«Սպերմատոգենեզը՝ (սերմնաբջիջների առաջացման և ձևավորման պրոցեսը) բջիջների արագ կիսման և բազմացման գործընթաց է, այն խիստ զգայուն է արտաքին վնասակար գործոնների նկատմամբ:
Ալկոհոլը և թմրանյութերը ինչպես ուղղակիորեն, այնպես էլ այլ օրգանների ֆունկցիան վնասելով, առաջ են բերում սերմնաբջիջների շարժունակության արգելակում, շատացնում դեֆեկտավոր բջիջների տոկոսային պարունակությունը:
Ծխախոտի ծուխը պարունակում է բազմաթիվ վնասակար նյութեր։ Հատկապես վերարտադրողական համակարգի համար վնասակար է համարվում ակրոլեինը: Ծխելն ազդում է սերմնաբջիջների ԴՆԹ-ի վրա և կարող է պատճառ հանդիսանալ պտղի մոտ զարգացման անոմալիաների:
Սպերմատոգենեզի ամբողջ գործընթացը տևում է մոտ 65-70 օր, ուստի հղիություն պլանավորելուց արդեն 3 ամիս առաջ խորհուրդ է տրվում հրաժարվել բոլոր վնասակար սովորույթներից»:
Աղբյուր՝ Tert.am