Ավելորդ քաշից ազատվել ցանկացողներն առաջին հերթին՝ հրաժարվում են հացից, բայց չի կարելի ասել, թե սա ամենաճիշտ որոշումն է։
Հացը սննդակարգի կարևորագույն էլեմենտներից է, որն օրգանիզմին անհրաժեշտ մի շարք օգտակար նյութեր է պարունակում՝ ամինաթթուներ, ածխաջրեր, վիտամիններ, սպիտակուցներ, ճարպեր և բջջանյութ։
Հենց այդ պատճառով այս մթերքից ամբողջությամբ հրաժարվելն այնքան էլ հիմնավոր չէ։
Խորհուրդ է տրվում նախապատվություն տալ խոշոր աղացած ալյուրից պատրաստված հացին։
Այն ավելի շատ օգտակար նյութեր ու միկրոէլեմենտներ է պարունակում։
Ամբողջական հացահատիկից պատրաստված հացը մանրաթելերի աղբյուր է, որոնք կարող են օգնել կանխարգելել սիրտ-անոթային հիվանդությունների և հաստ աղու հիվանդությունների առաջացումը։
Ամբողջական հացահատիկը մեծ քանակով վիտամին B և սպիտակուցներ է պարունակում։
Ցորենի ալյուրից պատրաստված հաց։ Սա չի կարելի համարել ամենաօգտակար հացը։ 100 գրամ հացը պարունակում է 270 կիլոկալորիա և 2.9 գրամ ճարպ։ Այս հացն արագ է յուրացվում։ Ածխաջրերը հայտնվում են արյան մեջ, գլյուկոզայի արտանետման պատճառ դառնում, ինչի հետևանքով ախորժակը մեծանում է։ Բացի այդ՝ ցորենի ալյուրից պատրաստված սպիտակ հացը մեծ քանակով սնձան է պարունակում, ինչը կարող է հանգեցնել աղիների դանդաղ աշխատանքի։
Տարեկանի հաց։ Այս հացը մեծ քանակով բջջանյութ, լիզին է պարունակում։ Այն օրգանիզմից դուրս է բերում վտանգավոր նյութերը, օգտակար է ավիտամինոզի, շաքարային դիաբետի, փորկապության դեպքում։ Բացի այդ՝ հացի այս տեսակն օգնում է կարգավորել նյութափոխանակությունը։
Ուշադրություն դարձրեք այն հանգամանքին, որ հացի այս տեսակը հակացուցված է բարձր թթվայնության դեպքում։ Եթե հացը պատրաստված է միայն տարեկանի ալյուրից, այն դժվարամարս է դառնում։ Դրա մշակման ընթացքը հեշտացնելու համար սովորաբար ավելացվում է նաև ցորենի ալյուր։ Արդյունքում՝ այս հացը լավ է յուրացվում օրգանիզմի կողմից։
Հնդկաձավարի ալյուրից պատրաստված հաց։ Այս հացը ևս օրգանիզմին անհրաժեշտ ամինաթթուներ է պարունակում։ Այն հարուստ է կալիումով, ֆոսֆորով, երկաթով, ցինկով, սելենով, մագնեզիումով, մանգանով, հակաօքսիդանտներով, B, E խմբի վիտամիններով։ Օգտակար է անոթների հիվանդության դեպքում։
Հացահատիկ։ Մուգ հաց՝ հացահատիկներով։ Պարունակում է կալիում, նատրիում, մոլիբդեն, ֆոսֆոր, յոդ, երկաթ, կալցիում, մեծ քանակով B խմբի, A, E վիտամիններ: Բարենպաստ ազդեցություն է ունենում նյութափոխանակության վրա, հագեցնում է, կարգավորում է աղիների միկրոֆլորան։
Թեփի հաց։ Մեծ քանակով բջջանյութեր հանքանյութեր, վիտամիններ ու սպիտակուցներ է պարունակում։ Ամրացնում է իմունիտետը, օրգանիզմից դուրս բերում ալերգեններն ու տոքսինները։ Օգնում է կանխարգելել աղեստամոքսային տրակտի հիվանդությունների զարգացումը, նպաստում է քաշի նվազեցմանը, այդ պատճառով էլ դիետիկ է համարվում։
Առանց խմորիչի հաց։ B խմբի վիտամիններ է պարունակում։ Չի վնասում աղիքային միկրոֆլորային, նպաստում է աղիների աշխատանքին, ինչպես նաև հակաբորբոքային հատկություններ ունի։ Բացասական կողմերից մեկն այն է, որ այս հացին հաճախ քիմիական միջոցներ են ավելացնում՝ հոտն ու համը լավացնելու համար։
Նյութը հրապարակման պատրաստեց zNews-ը
Տեղեկացրե՛ք Ձեր մտերիմներին
