Երեխաների նկարած պատկերները շատ բան կարող են պատմել իրենց ներաշխարհի մասին:

Ձեր փոքրիկի նկարը կօգնի Ձեզ հասկանալ նրա հոգեվիճակն ու զգացմունքները:

Հոգեբանները խորհուրդ են տալիս երեխայի նկարում 4 կարևոր դետալի ուշադրություն դարձնել՝

1.գունային գամմա,

2.նկարի դիրք,

3.բովանդակություն,

4.նկարի ընդհանուր տրամադրություն:

Առաջին բանը, որին պետք է ուշադրություն դարձնել նկարում, գույնն է:

Եթե Ձեր փոքրիկը գույները ճիշտ է օգտագործում (օրինակ՝ կապույտ երկինք, կանաչ տերև և այլն), ապա անհանգստանալու կարիք չկա: Երեխան հանգիստ է ու ներդաշնակ:

Իսկ եթե փոքրիկը օգտագործում է խառը, ոչ բնական գույներ, ապա, ամենայն հավանականությամբ, նա ինչ-որ բանից դժգոհ կամ անհանգստացած է:

Հնարավոր է՝ փոքրիկը նկարելիս նախապատվություն է տվել մեկ գույնի: Այս դեպքում արդեն ուշադրություն դարձրեք ընտրված գույնին: Օրինակ` կարմիրը կարող է պատմել Ձեր բալիկի ակտիվության, աշխույժ կենսակերպի մասին, կապույտը կարող է վկայել, որ փոքրիկը տխուր է կամ ինչ-որ մեկին կարոտում է: Իսկ երբ փոքրիկը օգտագործում է միայն սև գույնը, ապա հոգեբանները խորհուրդ են տալիս անհանգստանալ: Ամենայն հավանականությամբ նա ինչ-որ բանից վախեցած ու անհանգստացած է:

Նկարի դիրքը ևս շատ կարևոր է:

Եթե փոքրիկը նկարել է թղթի կենտրոնում կամ ամբողջ թղթի մակերեսով, ապա ինքնավստահ է: Իսկ եթե Ձեր բալիկը օգտագործում է թղթի անկյունները, ապա նա բարդույթավորված է, փակ ու ինքնամփոփ:

Այնուհետև պետք է ուշադրություն դարձնել նկարի բովանդակությանը, ընդհանուր կոմպոզիցիային և առանձին դետալներին: Երեխաները ամենից հաճախ նկարում են իրենց ընտանիքը, տունը, կենդանիներ, բնություն: Օրինակ՝ եթե փոքրիկը նկարում է հեքիաթների, մուլտֆիլմերի իր սիրելի հերոսներին, դա բնական է ու օրինաչափ:

Այս դեպքում արդեն պետք է ուշադրություն դարձնել նկարի ընդհանուր տրամադրությանը:

Կարևոր է՝ նկարում ժպտում են հերոսները, թե ոչ, նրանք բարկացած են, թե ոչ … Այս մանրուքները կօգնեն հասկանալ Ձեր փոքրիկի հոգեվիճակը, տրամադրությունը և որ ամենակարևորն է՝ նրա աշխարհընկալումը:

Հնարավոր է, որ Ձեր երեխան ճիշտ չի ընկալում շրջապատող իրերը, երևույթներն ու իրադարձությունները, և այս դեպքում նրա ստեղծագործությունը շատ կօգնի Ձեզ:

Եթե երեխան նկարել է իր ընտանիքը և իրեն էլ պատկերել է այդ նկարում, ապա անհանգստանալու կարիք չկա: Նա իրեն պաշտպանված է զգում:

Իսկ նկարում ընտանիքի անդամներից մեկի բացակայությունը խոսում է այդ մարդու հանդեպ երեխայի բացահայտ բացասական վերաբերմունքի մասին:

Երբ երեխան իրեն նկարում է ընտանիքից առանձին կամ շատ ավելի փոքր չափսերով, ապա նա իրեն չսիրված ու միայնակ է զգում: Փոքրիկի դիրքը կարող է պատմել նաև այն մասին, թե ում հետ է առավել մտերիմ (օրինակ` ում կողքին է երեխան, ում ձեռքն է բռնել կամ գրկել):

Նյութը հրապարակման պատրաստեց zNews-ը

Կիսվե՛ք Ձեր ընկերների հետ