Լյարդի ցիռոզը չի դրսևորվում ցավոտ զգացողություններով, քանի որ այս օրգանը չունի ցավի ընկալիչներ, սակայն կան որոշակի ոչ ակնհայտ ախտանշաններ, որոնք կարող են հուշել այս վտանգավոր հիվանդության մասին։ Այս մասին Медикфоруму-ի հետ զրույցում ասել է հապատոլոգ Եվգենի Ռոմանովը։
Մասնագետի խոսքով՝ լյարդի այս հիվանդության մասին կարող են վկայել մաշկի դեղնավուն երանգն ու որոշակի հատվածների քորը։
«Որպես կանոն, քորը նկատվում է ափերի ու ներբանների հատվածում, ինչպես նաև ձեռքերի և ոտքերի մատների միջև։ Երբեմն դա այնքան հոգնեցնող է լինում, որ մարդու մոտ անքնություն է զարգանում։ Նման դեպքերում բժիշկներն ունեն հատուկ տերմին՝ լյարդային քոր։ Դա պայմանավորված է լինում հյուսվածքքների խորը շերտերում լեղու պիգմենտների կուտակմամբ, որոնք էլ գրգռում են նյարդային վերջավորությունները»,- պարզաբանել է բժիշկը։
Ռոմանովի խոսքով՝ լյարդի ցիռոզի ախտանշան կարող են դառնալ նաև ախորժակի կորուստը, մեզի ու կղանքի գույնի փոփոխությունը, բերանում դառը համի առկայությունն ու որովայնի մեծացումը։ Ինչպես նախազգուշացրել է մասնագետը, այս հիվանդությունը կարող է հանգեցնել մահվան, ուստի վերոնշյալ ախտանշանների առկայության դեպքում հարկավոր է անպայման բուժզննում անցնել։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
