Ականջի արտաքին լսողական անցուղին սխալ կամ հազվադեպ մաքրելու հետևանքով ականջի ծծումբը կուտակվում է, ինչը կարող է դառնալ ականջախցանի առաջացման պատճառ:
Այս խնդիրը հաճախ ուղեկցվում է քորով, ականջներում աղմուկով և ցավոտ զգացողություններով, ուստի նման ախտանշանների առկայության դեպքում հարկավոր է անպայման միջոցներ ձեռնարկել:
Ականջի ծծմբախցանի առաջացումից խուսափելու համար հարկավոր է պարզապես հետևել հիգիենայի պարզ կանոններին, սակայն խնդիրն այն է, որ ոչ բոլորին է հաջողվում ճիշտ մաքրել ականջները:
Հայտնի է, որ ակնջային ծծումբը շատ կարևոր պաշտպանական գործառույթ է կատարում, սակայն երբեմն այն չափազանց շատ է արտազատվում, ինչի հետևանքով կարող է ծծմբախցան առաջանալ:
Սա կարող է դառնալ լսողության վատացման և անգամ դրա կորստի պատճառ, ուստի խնդիրը ոչ մի դեպքում չի կարելի անուշադրության մատնել:
Սովորաբար նման դեպքերում հարկավոր է անպայման դիմել բժշկին կամ կիրառել հատուկ դեղամիջոցներ, որոնք օգնում են լավ մաքրել ականջները, սակայն կա նաև մի ժողովրդական միջոց, որը նույնքան արդյունավետ է և շատ ավելի պարզ: Այս մեթոդը հատկապես արդիական է այն դեպքերում, երբ հիվանդանոց գնալու կամ մասնագետի հետ խորհրդակցելու հնարավորություն չկա:
Ականջները կուտակված ծծմբից հեշտությամբ մաքրելու համար անհրաժեշտ է ընդամենը երկու բաղադրիչ՝ սպիտակ քացախ և սպիրտ: Այս համադրությունը տարրալուծում է ականջային ծծումբն ու թույլ է տալիս հեշտությամբ մաքրել լսողական անցուղին: Բացի այդ, այն օժտված է նաև ախտահանիչ հատկություններով, ինչն օգնում է խուսափել տարատեսակ վարակներից:
Անհրաժեշտ է խառնել մեկ ճաշի գդալ սպիտակ քացախն ու կես գդալ սպիրտը, ավելացնել նաև մեկ թեյի գդալ եռացրած (ոչ տաք) ջուր, լավ խառնել, այնուհետև կաթոցիկով 1-2 կաթիլ կաթեցնել ականջի մեջ ու սպասել մոտ մեկ րոպե: Հարկավոր է ուշադիր լինել և գլուխը մի փոքր թեքել, այլապես հեղուկը դուրս կհոսի:
Այս պրոցեդուրան կարելի է կրկնել շաբաթական առավելագույնը 2 անգամ: Եթե խնդիրը չի լուծվում, ապա հարկավոր է անպայման դիմել մասնագետին, քանի որ լուրջ խցանման դեպքում միայն բժիշկը կկարողանալ մաքրել լսողական անցուղին:
Այս պրոցեդուրայից բացի կան նաև այլ՝ ավելի մեղմ պրոցեդուրաներ, որոնք նույնպես շատ արդյունավետ են: Օրինակ՝ կարելի է ականջների մեջ մանկական յուղ կամ ջրի ու ջրածնի պերօքսիդի խառնուրդ (1:1 հարաբերակցությամբ) կաթեցնել: Սակայն ամեն դեպքում հարկ է հիշել, որ տան պայմաններում նման պրոցեդուրաներ անցկացնելիս հարկավոր է շատ զգույշ լինել:
Նյութը հրապարակման պատրաստեց zNews-ը
Տեղեկացրե՛ք Ձեր մտերիմներին