Խլամիդիան տարածված հիվանդություն է և դասվում է սեռական ճանապարհով փոխանցվող հիվանդությունների շարքին: Հիվանդության տարածման ուղիները սեռական հարաբերություններն են:

Այն կարող է նաև ծննդաբերության ժամանակ մորից փոխանցվել նորածին երեխային:

Խլամիդիան կարող է լինել առանց ախտանիշների, որը կոչվում է «համր» ձև:

Կանանց մոտ սկզբնական շրջանում այս բակտերիան ախտահարում է միզուկն ու արգանդի վզիկը, նկատվում են հեշտոցային արտադրություն և միզելուց` այրոցի զգացողություն:

Այնուհետև, երբ ինֆեկցիան տարածվում է դեպի ֆալոպյան խողովակներ, կնոջ մոտ առաջանում են որովայնի ստորին հատվածների և մեջքի ցավեր, ջերմություն, սրտխառնոց, ցավոտ սեռական հարաբերություն և այլն:

Տղամարդկանց մոտ խլամիդիայի նշաններն են՝ առնանդամից արտադրություն, միզելուց այրոցի զգացողություն, ինչպես նաև ամորձիների ցավ և այտուցվածություն:

Ախտորոշման համար անհրաժեշտ է կատարել մի շարք լաբորատոր հետազոտություններ: Խլամիդիան համարվում է վտանգավոր հիվանդություն և շատ լուրջ հետևանքներ կարող է ունենալ կնոջ և տղամարդու սեռական ու վերարտադրողական ֆունկցիաների վրա:

Կնոջ մոտ առաջացնում է կոնքի բորբոքային հիվանդություն, որի հետևանքով ախտահարվում են ֆալոպյան խողովակները, խանգարվում է ձվաբջիջների անցումն արգանդի խոռոչ: Տղամարդկանց մոտ խլամիդիան առաջացնում է մակամորձու սուր բորբոքում և անպտղություն, նաև` հոդերի ախտահարում:

Հղիների մոտ խլամիդիան նույնպես ունի վտանգավոր հետևանքներ: Այսպես. նորածինների մոտ կարող է զարգանալ կոնյուկտիվիտ, աչքի բորբոքում , որի հետևանքով՝ նույնիսկ` կուրություն, իսկ խլամիդիային թոքաբորբը նորածին երեխայի համար կարող է լինել մահաբեր: Ընդհանրապես, խլամիդիան հղի կանանց մոտ առաջացնում է վաղաժամ ծննդաբերություն, արյունահոսություն կամ պտղի թերսնուցում:

Խլամիդիայի բուժումն անհրաժեշտ է կատարել ախտանիշների առկայության և ախտորոշման հաստատման պարագայում: Կանխարգելման համար հարկավոր է օգտագործել պահպանակներ և վարել սեռական կյանք մեկ զուգընկերոջ հետ:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ