Սրտի առողջության բրիտանական հիմնադրամի մասնագետները նշել են այն ռիսկային գործոնները, որոնք ազդում են կանանց մոտ սրտանոթային հիվանդությունների զարգացման հավանականության վրա:

Բժիշկների խոսքով՝ այս հիվանդությունները հաճախ են անտեսվում վատ ախտորոշման հետևանքով:

Բրիտանացի գիտնականների տվյալներով՝ 2003-2013 թվականներն ընկած ժամանակահատվածում սրտի հիվանդությունների հետևանքների պատճառով մահացել է ավելի քան 8000 կին, որոնք ժամանակին չեն բուժվել ինչպես հարկն է:

Մասնագետները ենթադրում են, որ սա պայմանավորված է նրանով, որ կանայք հաճախ այլ խնդիրներին են վերագրում սրտի հիվանդությունների մասին հուշող ախտանշանները:

Տղամարդկանց մոտ նման հիվանդությունները դրսևորվում են կրծքի ցավերով, սակայն կանանց դեպքում այս ախտանշանը կարող է բացակայել:

Միևնույն ժամանակ կարող են նկատվել այնպիսի ախտանշաններ, ինչպիսին են սրտխառնոցը, առատ քրտնարտադրությունը, հևոցն ու գլխապտույտը:

Սա է պատճառը, որ կանայք սրտի հիվանդությունների ժամանակ ի հայտ եկող ախտանշանները հաճախ վերագրում են այլ խանգարումներին:

Միևնույն ժամանակ գիտնականներն ընդգծում են, որ կան սրտանոթային հիվանդությունների զարգացմանը նպաստող գործոններ, որոնք կանանց դեպքում շատ ավելի վտանգավոր են, քան տղամարդկաց դեպքում:

Այդ գործոններն են ծխախոտի գործածությունը, զարկերակային բարձր ճնշումն ու շաքարային դիաբետը:

«Ծխելը, արյան բարձր ճնշումն ու շաքարային դիաբետը կապված են կանանց մոտ սրտի նոպայի զարգացման ավելի բարձր հավանականության հետ, քան տղամարդկանց մոտ: Այս ռիսկային գործոնների առկայութան դեպքում կանայք պետք է պարբերաբար բուժզննում անցնեն: Առհասարակ մենք խորհուրդ ենք տալիս բոլոր կանանց ժամանակ առ ժամանակ ստուգել սրտամկանի վիճակը», – նշում են բրիտանացի բժիշկները:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ