Օրգանիզմի ծարացումը բնական գործընթաց է որից հնարավոր չէ խուսափել, սակայն գլխուղեղի հյուսվածքների չափազանց արագ ծերացումը կարող է խիստ բացասաբար անդրադառնալ մարդու կյանքի որակի վրա, ուստի զարմանալի չէ, որ մասնագետները հորդորում են անել հնարավոր ամեն բան այդ գործընթացը դանդաղեցնելու համար։
Svenska Dagbladet պարբերականը ներկայացրել է շվեդ գիտնականների խորհուրդները, որոնց հետևելը կօգնի դանդաղեցնել գլխուղեղի ծերացման գործընթացը։ Մասնագետները վստահ են, որ կենսակերպում այս պարզ փոփոխություններն անելը կօգնի հասնել զգալի արդյունքի, սակայն այս հարցում հարկավոր է խիստ հետևողական լինել ու կանոնավոր հետևել մասնագետների խորհուրդներին։
Բավարար ֆիզիկական ակտիվություն
Գլխուղեղի ծերացման գործընթացը դանդաղեցնելու համար գիտնականներն առաջին հերթին խորհուրդ են տալիս լինել ֆիզիկապես հնարավորինս ակտիվ և խուսափել հիպոդինամիայից։ Նրանց խոսքով՝ նստակյաց կենսակերպն ուժեղացնում ու խթանում է օրգանիզմում ընթացող բորբոքային գործընթացները, ինչպես նաև բարձրացնում է թուլամտության (դեմենցիա) զարգացման հավանականությունը։
Առողջ քուն
Առողջ ու տևական քունը շատ կարևոր է գլխուղեղը սպիտակուցային միացություններից մաքրելու գործընթացների համար, իսկ այդ միացություններն «աղտոտում» են ուղեղն ու բարձրացնում նյարդաբանական հիվանդությունների զարգացման հավանականությունը։ Սա է պատճառը, որ գլխուղեղի առողջությունը պահպանելու և կենտրոնական նյարդային համակարգի ծերացումը դանդաղեցնելու համար հարկավոր է առաջին հերթին կարգավորել քունը։
Աղիների առողջության պահպանում
Աղիների առողջ միկրոֆլորան առանցքային դեր է խաղում գլխուղեղի առողջության պահպանման ու ծերացման կործանարար ազդեցության նվազեցման հարցում։ Աղիների միկրոֆլորայի պահպանման ամենապարզ միջոցը սննդակարգի բազմազանության ապահովումն ու բավարար քանակությամբ մանրաթելերի գործածությունն է։ Մասնագետների խոսքով՝ հոգեկան առողջության համար այդքան կարևոր սերոտոնին հորմոնի 90%-ն արտադրվում է հենց աղիներում, և միայն 10%-ն է արտադրվում գլխուղեղում, ուստի աղիների վիճակը վերահսկողության տակ պահելը շատ կարևոր է։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
