Գլխուղեղի կաթվածն ամենավտանգավոր հիվանդություններից մեկն է, որը կարող է շատ վատ հետևանքներ ունենալ ու անգամ հանգեցնել մահվան:

Այս ախտաբանության դեպքում վաղ ախտորոշումը շատ կարևոր է, քանի որ թույլ է տալիս հնարավորինս շուտ միջոցներ ձեռնարկել հնարավոր բարդություններից խուսափելու համար, սակայն խնդիրն այն է, որ երբեմն կաթվածը չի դրսևորվում ակնհայտ ախտանշաններով, ինչի պատճառով մարդիկ նկատում են այն չափազանց ուշ և անհրաժեշտ բուժօգնությունը ևս ուշանում է:

Նման խնդիրներից խուսափելու համար բժիշկ-նյարդաբան Ամինատ Դոլովան ներկայացրել է գլխուղեղի «լուռ» կաթվածի մասին հուշող հիմնական ախտանշանները, որոնք ոչ մի դեպքում չի կարելի անուշադրության մատնել:

Մասնագետի խոսքով՝ այս հիվանդությունը չի դրսևորվում վառ ախտանշաններով, սակայն առողջական վիճակի որոշ փոփոխություններ, այնուամենայնիվ, կարող են հուշել բժշկին դիմելու անհրաժեշտության մասին: Նման ախտանշանների առկայության դեպքում բուժզննում անցնելը շատ կարևոր է, քանի որ չբուժված ասիմպտոմ գլխուղեղի կաթվածը հետագայում կարող է գլխուղեղի արյան շրջանառության էլ ավելի լուրջ խանգարումների հանգեցնել:

Ինչպես նշում է նյարդաբանը՝ այս խնդրի մասին հուշող ախտանշանների շարքին են դասվում խոսքի հստակության կորուստը, դեմքի անհամաչափությունը, վերջույթների թմրածությունն ու թուլության զգացումը, անկայուն քայլվածքը, շլության զարգացումը, անհասկանալի խոսքն ու անսպասելի գլխապտույտը:

Ըստ Դոլովայի՝ գլխուղեղի կաթվածի դեպքում բարեհաջող բուժման հավանականությունը որպես կանոն բավական բարձր է լինում, քանի որ վիճակագրական տվյալներով հիվանդների միայն 10-15 տոկոսի մոտ են զարգանում ավելի լուրջ բարդություններ: Մասնագետն ընդգծում է, որ այս հիվանդության զարգացման հավանականությունն ավելի բարձր է լինում այն մարդկանց մոտ, որոնք հաճախ են բախվում զարկերակային բարձր ճնշման խնդրին, ունեն շաքարային դիաբետ, աթերոսկլերոզ ու առիթմիա: Այս ռիսկային գործոնների առկայության դեպքում հարկավոր է ավելի լավ հետևել առողջական վիճակին և առաջին իսկ ախտանշանների ի հայտ գալու դեպքում դիմել բժշկին:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ