Սրտանոթային համակարգի հիվանդությունները համարվում են ամբողջ աշխարհում մարդկանց վաղաժամ մահվան հիմնական պատճառներից մեկը, ինչը պայմանավորված է նրանով, որ դրանք հաճախ ախտահարում են մարդու կարևորագույն օրգաններից մեկը՝ սրտամկանը։
Սովորաբար այս հիվանդությունները մտազուգորդվում են կրծքավանդակի ցավերի հետ, քանի որ սա ամենատարածված ախտանշանն է, որը հուշում է մարդկանց շտապօգնություն կանչելու անհրաժեշտության մասին, սակայն շատ դեպքերում խնդիրը կարող է չուղեկցվել ցավով և դրսևորվել շատ ավելի քիչ ակնհայտ ախտանշաններով՝ հանգեցնելով շատ վատ հետևանքների։
Սրտանոթային համակարգի հիվանդությունների դեպքում հիվանդի մահվան հիմնական պատճառը լինում է սրտի կանգը, որը բնորոշվում է հիվանդի մոտ սրտամկանի գործառույթների կտրուկ կորստով։
Ավելին՝ սրտի կանգ կարող է արձանագրվել անգամ բացարձակ առողջ մարդու մոտ, ինչը սովորաբար անակնկալ է լինում՝ թույլ չտալով միջոցներ ձեռնարկել։
Մասնագետների խոսքով՝ սրտի կանգը կարող է տեղի ունենալ որևէ խնդրի ախտաշանների ֆոնին կամ անսպասելի, սակայն գրեթե միշտ լինում են որոշակի ախտանշաններ, որոնք հուշում են վտանգի մասին։
Դրանց շարքին են դասվում ոչ միայն կրծքավանդակի ցավը, այլև․
- սաստիկ թուլությունը,
- արագացած կամ անկանոն սրտի զարկերը, ինչը կապված է լինում հևոցի հետ,
- գիտակցության կորուստը,
- անսպասելի սաստիկ հևոցը,
- սպիտակ կամ վարդագույն փրփրանման լորձով ուղեկցվող հազը։
Վերոնշյալ ախտանշանները ոչ մի դեպքում չի կարելի անուշադրության մատնել, քանի որ դրանք հուշում են սրտի կանգի բարձր հավանականության մասին և ենթադրում են անհապաղ բուժօգնություն։
Ընդ որում՝ հատկապես վտանգավոր է հևոցը, ուստի տանը հարկավոր է միշտ ունենալ պուլսօքսիմետր արյան մեջ թթվածնի մակարդակը վերահսկողության տակ պահելու համար։
Եթե այդ ցուցանիշը 95 տոկոսից ցածր է, ապա հարկավոր է դիմել բժշկին։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
