Մարդու օրգանիզմի բոլոր համակարգերն ու օրգանները փոխկապակցված են, ուստի զարմանալի չէ, որ այս կամ այն հիվանդության մասին կարող են հուշել առաջին հայացքից դրանց հետ որևէ կապ չունեցող ախտանշանները։
Առհասարակ կան օրգաններ, որոնց ընդհանուր վիճակին ուշադրություն դարձնելը կարող է օգնել ժամանակին նկատել վտանգավոր ախտաբանություններն ու միջոցներ ձեռնարկել հնարավորինս շուտ խնդրից ազատվելու համար։
Ինչպես նշել է թերապևտ, մաշկաբան Լարիսա Ալեքսեևան lenta.ru-ի հետ զրույցում նման օրգանների շարքին են դասվում մարդու աչքերը, որոնց վիճակը վերահսկողության տակ պահելը թույլ կտա հասկանալ՝ ինչ խանգարումներ կան մարդու օրգանիզմում։ Օրինակ՝ աչքերի սպիտակուցային թաղանթի դեղնավուն երանգը կարող է հուշել լյարդի հիվանդությունների մասին, տեսողության կտրուկ վատթարացումը կարող է պայմանավորված լինել շաքարային դիաբետի զարգացմամբ։ Բացի այդ, աչքերը կարող են նախազգուշացնել նաև սրտանոթային համակարգի հիվանդությունների կամ օրգանիզմում ալերգիկ ռեակցիաների զարգացման մասին։
«Աչքերի մեջ մազանոթների արտահայտված լինելն ու արյունազեղումները կարող են վկայել շաքարային դիաբետի զարգացման մասին։ Ժամանակին բուժումը չսկսելու դեպքում բարձր է կատարակտի զարգացման ու տեսողության վատթարացման վտանգը», – նշել է բժիշկը։
Նրա խոսքով՝ աչքերի կարմրությունն ու այտուցվածությունը կարող է պայմանավորված լինել ալերգիկ ռեակցիայով, մինչդեռ կորոնավիրուսային վարակով հիվանդացածների մոտ հաճախ է նկատվում հետքովիդային շաղկապենաբորբ (կոնյուկտիվիտ)։ Ինչ վերաբերում է աչքերի սպիտակուցային թաղանթի դեղնավուն երանգին, ապա մասնագետը նախազգուշացրել է, որ այն պայմանավորված է լինում օրգանիզմում բիլիռուբինի բարձր մակարդակով, ուստի նման ախտանշանի դեպքում հարկավոր է ստուգել լյարդի աշխատանքը։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
