Վիտամիններով թունավորումը կարող է դրսևորվել գլխացավերով, գլխապտույտով, դյուրագրգռությամբ, ալերգիկ ռեակցիաներով և քնի հետ կապված խնդիրներով, գրում է «Իզվեստիան»՝ ներկայացնելով խնդրի պատճառներն ու կանխարգելման միջոցերը։
Պարբերականի փոխանցմամբ՝ հիպերվիտամինոզի կամ վիտամիններով թունավորման հավանականությունը բարձր է այն մարդկանց մոտ, որոնք վիտամինային հավելումներ են ընդունում առանց նախապես մասնագետի հետ խորհրդակցելու։
Բանն այն է, որ վիտամինների ընդունման դեպքում շատ կարևոր է հաշվի առնել մի շարք գործոններ, այդ թվում նաև օրգանիզմի անհատական առանձնահատկություններն ու վիճակը։ Սա է պատճառը, որ դրանց ընդունումն սկսելուց առաջ հարկավոր է խորհրդակցել բանիմաց մասնագետի հետ, ով հաշվի կառնի բոլոր այդ գործոնները։
Փորձագետների կարծիքով՝ հիպերվիտամինոզի զարգացման հավանականությունը միայն ամենօրյա սննդակարգին հետևելու դեպքում բացակայում է։ Բացառություն են կազմում միայն այն դեպքերը, երբ մարդը մեծ քանակությամբ որոշակի մթերք է կիրառում, օրինակ՝ լյարդ կամ երիկամներ։
Եթե վիտամինային հավելումների ընդունման ֆոնին նկատվում են վերոնշյալ ախտանշաններից մեկը կամ մի քանիսը, ապա հարկավոր է անպայման դիմել մասնագետին, քանի որ մեծ է հիպերվիտամինոզի հավանականությունը։ Նման դեպքերում ախտորոշման հաստատման համար նշանակվում են արյան որոշակի հետազոտություններ, որոնց արդյունքների հիման վրա էլ որոշվում են հետագա քայլերը։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
