«Հուշագրություն իմ տխուր պոռնիկների մասին» վիպակը պատմում է իննսունամյա ծերունու մասին, որը վճռում է իր հոբելյանական իննսունամյակը «պատվել» տասնչորսամյա աղջնակի ընկերակցությամբ: Ծերունու և աղջնակի միջև շուրջ մեկ տարի ձգվող «արտասովոր» կապը վերջինիս ստիպում է վերհիշել անցյալը, հոդվածագրի մասնագիտությունը, և, իհարկե, ծախու կանանց այցելելու վաղեմի սովորությունը, իսկ հանկարծահաս զգացմունքը գալիս է համոզելու, որ սերը չունի տարիք, ժամ ու ժամանակ, սերը չի անցնում կրքի հետ, այլ կարող է արտահայտվել քնքշանքի, լռության և հիացմունքի ձևով: Իր այս ստեղծագործությամբ Մարկեսը հեռանում է քաղաքական ենթատեքստից և մոգական ռեալիզմից`հյուսելով անչափ ռոմանտիկ, բավական հուզիչ և գեղեցիկ սիրո պատմություն:

1. Մի մահացիր, մինչև որ չզգաս քո սիրելիի հետ քնելու հրաշքը:

2. Փառքը մի գեր տիկին է, ով չի քնում քեզ հետ, բայց երբ դու արթնանում ես, նա կանգած է լինում մահճակալի մոտ և հետևում է քեզ:

3. Այն անդիմադրելի ուժը, որը շարժում է աշխարհը, ամենևին երջանիկ սերը չէ, քանի որ սերը դժբախտ է:

4. Հնարավոր չէ ի վերջո չդառնալ այն մարդը, որը քեզ համարում են:

5. Լուռ խենթությունը մոտ ապագան է:

6. Տարիքը այն չէ, թե քանի տարեկան ես, այլ այն է, թե դու այն ինչպես ես զգում:

7. Առանց սիրո սեքսը մխիթարանք է նրանց համար, որոնց չի հասել սերը:

8. Սեռական առումով տարիքս երբեք ինձ չի մտահոգել, որովհետև իմ հնարավորությունները կախված էին ոչ այնքան ինձնից, որքան կանանցից. նրանք գիտեն ինչն ու ինչպեսը, երբ ուզում են:

9. Կյանքի լիակատար հաղթանակը հենց այն է, որ ծերունիների հիշողությունը չի պահպանում ոչ էական մանրուքները և միայն խիստ հազվադեպ է մեզ դավաճանում որևէ իսկապես կարևոր հարցում: Ցիցերոնը դա արտահայտել է մեկ ասույթով. «Չկա մի այնպիսի ծեր, որը մոռանար, թե որտեղ է թաքցրել գանձը»:

10. Քարտուղարուհիները դահլիճ բերեցին կարկանդակը` իննսուն վառվող մոմերով, որոնք առաջին անգամ ստիպեցին ինձ զգալ ապրած տարիներիս քանակը:

11. Ծերության հմայքներից մեկն այն քմայքներն են, որոնք իրենց թույլ են տալիս երիտասարդ մտերմուհիները` համարելով, որ դուք արդեն խաղից դուրս եք:

12. Ծերության առաջին նախանշանը մարդու` իր հորը նմանվել սկսելն է:

13. Լուսանկարներում մարդիկ ավելի շատ և ավելի վատ են ծերանում, քան իրականում:

14. Խանդն ավելին գիտի, քան ճշմարտությունը:

15. «Ծերանում եմ», – խոստովանեցի ես: «Մենք արդեն ծեր ենք, – հոգոց հանեց նա: – Պարզապես դա ներսից չես զգում, իսկ քեզ դրսից նայողները տեսնում են»:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ