Մեր սննդի մեջ հատուկ տեղ է գրավում նատրիումի հիդրոկարբոնատը (կերակրի սոդան): Առաջներում այն լայնորեն կիրառվում էր (մյուս հիմքերի նման) ստամոքսահյութի բարձր թթվայնության, ստամոքսի խոցի և 12-մատնյա աղիքի խոցերի դեպքում. սոդան չեզոքացնում է ստամոքսահյութի աղաթթուն:

Սակայն սոդայի կիրառումը միայն ստամոքսի այրոցքն ու սպասքը փայլեցնելով չի սահմանափակվում: Այն իր արժանի տեղն ունի տնային դեղատուփում: Ահա այն դեպքերը, երբ կարելի է հաջողությամբ սոդա կիրառել:

Կարիեսի կանխարգելում. բերանի խոռոչում մանրէների կենսագործունեության հետևանքով առաջացող թթվայնությունը քայքայում է ատամի էմալը: Այդ թթուները կարելի է չեզոքացնել բերանը օրական մի քանի անգամ սոդայի լուծույթով ողողելով: Նույն արդյունքը կարելի է ստանալ նաև սոդայի մեջ թաթախած ատամի խոզանակով ատամները մաքրելով: Այն նաև հղկող ազդեցություն ունի, ինչի շնորհիվ փայլեցնում է ատամները` առանց էմալը վնասելու:

Ոտքերի վատ հոտի դեպքում, ոտքերի համար նախատեսված ջրի մեջ մի քիչ սոդա ավելացնելով, կարող եք մանրէների արտադրած թթուները չեզոքացնել, որոնք ոտքերի տհաճ հոտի մեղավորներն են: Այն արդյունավետ է նաև թևատակերի վատ հոտի դեպքում:

Միջատների խայթոցի դեպքում. կծած տեղերը արյուն բերելու աստիճան քորելու փոխարեն, ավելի լավ է սոդան ջրով բացել, խյուս պատրաստել ու կծած տեղերին քսել: Այն կհանգստացնի նաև այլ բնույթի քորերը:

Շփաբորբի դեպքում. սոդայաջրով թրջոցները բարելավում են երեխաների հարված մասերը: Դրանք նվազեցնում են քորն ու արագացնում ապաքինումը:

Ցիստիտ. հիվանդածին մանրէներն ապրում են միզապարկում` թույլ թթվային միջավայրում: Եթե ձեր միզապարկը վարակի զոհ է դարձել, ուրեմն հետճաշյա գերազանց ըմպելիք է ջրով ու սոդայի խառնուրդով պատրաստված փրփրան կոկտեյլը:

Արևահարության դեպքում. գոլ ջրով լի վաննայի մեջ մի քիչ սոդա խառնեք, ինչը փափկացնում է ջուրը` վերածելով այն գրգռված մաշկի համար հանգստացնող թրջոցի:

Կորկորդացավի դեպքում. խառնեք 0,5 թեյի գդալ սոդան մեկ բաժակ ջրի մեջ ու 4 ժամը մեկ ողողեք կոկորդը: Այն չեզոքացնում է թթուն, որը ցավ է առաջացնում: Այս լուծույթով ողողումը բերանի խոռոչի բորբոքային պրոցեսը կվերացնի:

Բերանի վատ հոտի դեպքում ջրածնի գերօքսիդի հետ խառնուրդը հզոր օքսիդացնող հատկություն ունի, որը ոչնչացնում է վատ հոտ առաջացնող մանրէները: Դրա համար հարկավոր է մեկ ճաշի գդալ սոդան խառնել մեկ բաժակ ջրածնի գերօքսիդի հետ (2-3%) ու այդ լուծույթով ողողել բերանը:

Մրսածության դեպքում օգտակար է սոդայով ինհալացիան: Դրա համար հարկավոր է ոչ մեծ թեյնիկում 1 բաժակ ջուր եռացնել 1 թեյի գդալ սոդայի հետ, ապա կոշտ թղթից կամ ստվարաթղթից խողովակ սարքել կամ ձագար, մի կողմը հագցնել թեյնիկի քթին ու 10-15 րոպե ներշնչել գոլորշին: Այս ինհալյացիան նպատակահարմար է խորխի անջատման համար: Իսկ խորխի դուրսբերման համար օրական 2 անգամ քաղցած ստամոքսին պետք է 1/2 բաժակ տաք ջուր խմել, որի մեջ կես թեյի գդալ սոդա ու մի պտղունց աղ է լուծված: Քթըմպանի, բերանի խոռոչի, կոկորդաբորբերի, կոնյուկտիվիտի դեպքում օգտագործում են 0,5 – 2%-անոց սոդայի լուծույթ: Բերանի խոռոչի լորձաթաղանթն ախտազերծելու համար օգտակար է բերանը սոդայի թույլ լուծույթով ողողելը (85 գ սոդա, աղ` նույնքան . ողողել ուտելուց հետո):

Միգրենի հաճախակի նոպաների ժամանակ պետք է ամեն օր ընդունել սոդայաջրի լուծույթ. առաջին օրը ուտելուց 30 րոպե առաջ 1 բաժակ լուծույթ խմել (0,5գ և ջուր), 2-րդ օրը` 2 բաժակ և այլն, հասցնելով քանակը 7 բաժակի, ապա նվազեցման կարգով կուրսն ավարտել:

Ծխելու դեմ. հարկավոր է բերանի խոռոչը ողողել սոդայաջրով (1 ճաշի գդալ սոդա, 200 մլ ջուր):

Մաշկի չորության ու զանազան մաշկային հիվանդությունների դեպքում (իխտիոզ, փսորիազ) հարկավոր է սոդայաջրով լոգանք ընդունել (սոդա` 35 գ, մագնեզիումի կարբոնատ` 20 գ, մանգանի պերբորատ` 15 գ): Ջրի ջերմաստիճանը պետք է 38-39 աստիճան լինի, ապա աստիճանաբար ավելացնել: Լոգանքի տևողությունը` 15 րոպե:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ