Օրգանիզմում մակաբույծների առկայությունը կարող է քողարկվել սուր շնչառական վիրուսային վարակներով ու դրսևորվել, մասնավորապես, քթի փակվածությամբ։ Այս մասին lenta.ru-ի հետ զրույցում ասել է մանկաբույժ, գաստրոէնտերոլոգ Սվետլանա Ուժևկոն։
Նրա խոսքով՝ մակաբուծային վարակի ախտանշանները կախված են լինում մակաբույծի տեսակից, հիվանդության խորացման աստիճանից ու օրգանիզմի առանձնահատկություններից։
«Ասկարիդոզի դեպքում վարակման 3-7-րդ օրերին կարող է նկատվել հազ, քթի փակվածություն, մարմնի ջերմաստիճանի չափավոր բարձրացում։ Եվ, իհարկե, հաճախ ենթադրվում է, որ այն սուր շնչառական վիրուսային վարակ է», – նշել է Ուժևկոն։
Ինչպես հավելել է մասնագետը, մակաբուծային վարակն ախտորոշելը դժվար է, քանի որ մարդիկ հաճախ չեն էլ կասկածում վարակման մասին ու դիմում են բժշկին՝ գանգատվելով հոգնածությունից ու թուլությունից։ Բացի այդ, երբեմն մի քանի հետազոտության կարիք է լինում մակաբույծների առկայությունը հաստատելու համար։
Վարակումից խուսափելու համար գաստրոէնտերոլոգը խորհուրդ է տվել առաջին հերթին հետևել հիգիենայի կանոններին և կանոնավոր լվանալ ձեռքերը, չկրծոտել եղունգներն ու չուտել մրգերը և բանջարեղենն առանց լավ լվանալու։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
