Լյարդը մարդու ամենակարևոր օրգաններից մեկն է, ուստի դրա աշխատանքի խանգարումը բացասաբար է անդրադառնում ամբողջ օրգանիզմի վրա։
Լուրջ խնդիրներից խուսափելու համար այս օրգանի հիվանդությունները հարկավոր է հնարավորինս շուտ նկատել ու սկսել բուժումը, սակայն խնդիրն այն է, որ դրանք բավական դժվար են ախտորոշվում և հաճախ հայտնաբերվում են միայն զարգացման ուշ փուլերում։
Լյարդի ամենավտանգավոր հիվանդություններից մեկը լյարդային անբավարարությունն է, որի դեպքում օրգանը չի կարողանում ինչպես հարկն է կատարել իր գործառույթները։ Լյարդը կատարում է երկու կարևորագույն գործառույթ։ Այն հանդիսանում է օրգանիզմի գլխավոր զտիչը, ուստի տարրալուծում ու դուրս է բերում վտանգավոր ախտածին նյութերն օրգանիզմից, ինչպես նաև արտադրում է բավարար քանակությամբ լեղի մարսողության համակարգի ճիշտ աշխատանքի համար։ Լյարդային անբավարարության դեպքում այս գործառույթները խանգարվում են, ինչի հետևանքով օրգանիզմը ծանրաբեռնվում է սննդի վերամշակումից հետո մնացող տոքսիկ նյութերով։
Այս խանգարումը կարող է բավական լուրջ հետևանքներ ունենալ օրգանիզմի համար, ուստի նման խնդիրներից խուսափելու համար հարկավոր է սովորել ժամանակին նկատել օրգանի հետ կապված խնդիրների մասին հուշող նախանշանները։ Սա է պատճառը, որ մասնագետները ներկայացրել է այն ախտանշանները, որոնք կարող են նախազգուշացնել նման վտանգավոր խնդրի զարգացման մասին։
Նրանց խոսքով՝ զարգացման վաղ փուլերում հիվանդությունը կարող է դրսևորվել հոգնածության զգացումով, ինքնազգացողության ընդհանուր վատթարացմամբ, ախորժակի անբացատրելի կորստով, սրտխառնոցով ու որովայնի աջ հատվածում առաջացող թույլ տհաճ զգացողություններով, ինչը նշանակում է, որ նմամ խնդիրների առկայության դեպքում հարկավոր է անպայման խորհրդակցել բժշկի հետ։
Վերոնշյալ ախտանշանները նկատվում են հիվանդության զարգացման վաղ փուլերում, ուստի դրանք ժամանակին նկատելը շատ կարևոր է, սակայն լինում են դեպքեր, երբ լյարդային անբավարարությունը բավական երկար ժամանակ մնում է չախտորոշված ուստի ախտանշաններն արդեն այլ բնույթի են լինում։
Հիվանդության խորացման դեպքում կարող են նկատվել այնպիսի խնդիրներ, ինչպիսին են.
- մաշկի ու աչքերի սպիտակուցային թաղանթի դեղնավուն երանգը,
- մեզի մուգ գույնն ու տհաճ հոտը,
- շատ արագ ի հայտ եկող կապտուկները,
- ձեռքերի, ոտքերի ու որովայնի այտուցները,
- անբացատրելի մաշկային քորը։
Նման ախտանշանների ի հայտ գալը հուշում է լուրջ խնդիրների մասին, ուստի դրանք ոչ մի դեպքում չի կարելի անուշադրության մատնել։
Հարկ է հիշել, որ նման դեպքերում հարկավոր է հնարավորնս շուտ դիմել մասնագետին ու բուժզննում անցնել, քանի որ որքան շուտ հայտնաբերվի հիվանդությունը, այնքան մեծ կլինի բարեհաջող բուժման ու բարդություններից խուսափելու հավանականությունը։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ