Առողջ ու որակյալ քունն առողջության պահպանման ու լավ ինքնազգացողության կարևորագույն գրավականներից մեկն է, քանի որ թույլ է տալիս օրգանիզմին ինչպես հարկն է հանգստանալ ու վերականգնվել, մինչդեռ քնի վատ որակը կարող է խիստ վտանգավոր լինել ու բարձրացնել առողջական մի շարք խնդիրների զարգացման հավանականությունը։ Որոշ դեպքերում այն կարող է դառնալ անգամ գլխուղեղի կաթվածի պատճառ, ուստի քնի որակին հարկավոր է շատ լուրջ ուշադրություն դարձնել։
Մոսկվայի Ի. Սեչենովի անվան առաջին պետական բժշկական համալսարանի Անհատականացված սրտաբանության ինստիտուտի տնօրեն Ֆիլիպ Կոպիլովի խոսքով՝ քունը կարող է նման բացասական ազդեցություն ունենալ այն դեպքերում, երբ չափազանց տևական է կամ չափազանց կարճատև և շարունակում է այդպիսին լինել երկար ժամանակ։
Մասնագետի խոսքով՝ գիշերային քնի ստանդարտ տևողությունը յոթից ութ ժամն է, իսկ այս նորմայի կանոնավոր խախտումը կարող է մի շարք վտանգավոր խանգարումների, այդ թվում նաև կենտրոնական նյարդային համակարգի հիվանդությունների զարգացման պատճառ դառնալ։ Օրինակ՝ գլխուղեղի կաթվածի զարգացման հավանականությունը բարձրանում է, եթե մարդն աշխատում է մի ռեժիմով, որը թույլ չի տալիս քնել ու հանգստանալ ամեն գիշեր։
Բացի այդ, գլխուղեղի վրա խիստ բացասաբար է անդրադառնում նաև չափազանց կարճատև քունը կամ չափազանց երկարատև քունը։ Բժշկի խոսքով՝ «եթե քունը դուրս է գալիս յոթից ութ ժամ տևողությամբ ստանդարտի շրջանակներից, ապա այն կապված է գլխուղեղի կաթվածի հավանականության բարձրացման հետ»։ Ընդ որում՝ սա վերաբերում է ինչպես քնի ոչ բավարար տևողությանը, այնպես էլ չափազանց երկար տևողությանը։
Բացի այդ, ինչպես նախազգուշացնում է Կոպիլովը, գլխուղեղի կաթվածի հավանականությունը բարձրանում է նաև քնի օբստրուկտիվ ապնոէի դեպքում, որը բնորոշվում է քնած ժամանակ շնչառության կարճատև կանգերով։ Այս խանգարումը խիստ բացասաբար է անդրադառնում գլխուղեղին թթվածնի մատակարարման գործընթացի վրա, ինչն էլ շատ վտանգավոր հետևանքներ է ունենում։ Ապնոէի հիմնական դրսևորումներից մեկն է խռմփոցը, ուստի այս տհաճ խնդրի դեպքում հարկավոր է դիմել սոմնոլոգին ու միջոցներ ձեռնարկել շնչառությունը կարգավորելու և քնի որակը բարելավելու համար։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
