Գլխացավը շատ տարածված խնդիր է, որը կարող է պայմանավորված լինել ամենատարբեր պատճառներով։ Այն խիստ բացասաբար է անդրադառնում կյանքի որակի վրա, ուստի անկախ դրա զարգացման պատճառից մարդիկ փորձում են հնարավորինս շուտ ազատվել դրանից։
Որպես կանոն գլխացավերի դեպքում մարդիկ անմիջապես ցավազրկող դեղորայք են ընդունում և մոռանում են խնդրի մասին, սակայն մասնագետները նախազգուշացնում են, որ որոշ դեպքերում գլխացավերը պայմանավորված են լինում առողջական որոշակի խնդիրներով, որոնք ոչ մի դեպքում չի կարելի անտեսել։
Նյարդաբան Ալեքսանդր Եվդոկիմովը «Հինգերորդ ալիքի» («Пятый канал») հետ զրույցում թվել է գլխացավի այն տեսակները, որոնք կարող են պայմանավորված լինել առողջական շատ լուրջ խնդիրներով և որոնք անուշադրության մատնելը կարող է շատ վտանգավոր լինել։ Առաջին հերթին մասնագետը հորդորում է չանտեսել անսպասելի գլխացավը, որն ուղեկցվում է սրտի զարկերի արագացմամբ, շնչառության դժվարացմամբ, առատ քրտնարտադրությամբ ու աչքերի կարմրությամբ։ Նման գլխացավը հուշում է գերճնշումային կրիզի մասին, ինչը կարող է շատ վտանգավոր լինել։
«Գերճնշումային կրիզի բարդացումներն են գլխուղեղի կաթվածն ու սրտամկանի ինֆարկտը, իսկ զարկերակային բարձր ճնշման ժամանակ այդ վտանգները մեծանում են։ Եթե զարկերակային ճնշումը չի նվազում մեկ ժամվա ընթացքում, ապա հարկավոր է շտապօգնություն կանչել», – բացատրել է մասնագետը։
Երկարատև գլխացավերը կարող են հուշել գլխուղեղի արյան հոսքի փոփոխությունների մասին, ինչն էլ կարող է պայմանավորված լինել օնկոլոգիական հիվանդության զարգացմամբ։ Նման դեպքերում Եվդոկիմովը խորհուրդ է տալիս ամբողջական բուժզննում անցնել, որը թույլ կտա բացառել ախտաբանությունը կամ հայտնաբերել այն զարգացման վաղ փուլերում։
Բացի այդ, ինչպես նշում է մասնագետը, գլխացավի պատճառ կարող են դառնալ նաև վարակիչ հիվանդությունները, այդ թվում՝ մենինգիտն ու գլխուղեղի բորբոքումը։ Նման դեպքերում բուժօգնությունից հրաժարվելը կարող է հանգեցնել մահվան, ուստի հարկավոր է հնարավորինս շուտ դիմել բժշկին։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
