Փորափքանը բավական տարածված խնդիր է, որը սովորաբար վերագրվում է մեծ քանակությամբ սննդի կամ սննդամթերքի որոշակի տեսակների գործածությանը, սակայն մասնագետները հիշեցնում են, որ որոշ դեպքերում այն կարող է պայմանավորված լինել առողջական բավական լուրջ խնդիրներով, որոնք ոչ մի դեպքում չի կարելի անուշադրության մատնել։
Ինչպես նշել է բժիշկ-գաստրոէնտերոլոգ Մարատ Զինատուլինը 5-tv.ru-ի հետ զրույցում, փորափքանը ոչ միշտ է պայմանավորված լինում գազերի առաջացմանը նպաստող մթերքի գործածությամբ։
Մասնագետի խոսքով` աղիներում գազերի կուտակումն ու փորափքանը կարող են հուշել կաթի կամ սնձանի (գլյուտեն) նկատմամբ օրգանիզմի անհանդուրժողականության մասին։ Բացի այդ, ինտենսիվ գազերի կուտակման պատճառ կարող է դառնալ նաև ստամոքսի, ենթաստամոքսային գեղձի կամ լեղապարկի աշխատանքի խանգարումը։
Անդրադառնալով փորափքանի վտանգավոր պատճառներին` Զինատուլինն ընդգծել է սուր, ծակող, մղկտում, սպազմային ցավերով ուղեկցվող փորափքանը, որը ոչ մի դեպքում չի կարելի անտեսել։ Նման ցավեր կարող են պայմանավորված լինել աղիների ամբողջականության խանգարմամբ, ինչի պատճառ կարող են դառնալ էրոզիաները, խոցերը կամ ուռուցքները։
Բժշկի խոսքով` նման ցավոտ զգացողություններով ուղեկցվող փորափքանի դեպքում հարկավոր է անպայման դիմել մասնագետին ու բուժզննում անցնել։ Ընդ որում` բուժզննում անցնելը հատկապես կարևոր է աղիների աշխատանքի խանգարման` փորլուծության կամ փորկապության դեպքում։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
