«Իսկ ե՞րբ ես ամուսնանալու», «Չե՞ք ուզում դեռ երկրորդ երեխան ունենալ», «Ասում են՝ բաժանվում եք, հա՞». հետաքրքրասեր զրուցակիցը անհարմար դրության մեջ կարող է դնել, եթե չունենաք «պաշտպանիչ» պատասխաններ:
Նմանատիպ հարցերի պատասխանները պետք չէ տեղում մտածել. հոգեբանները խորհուրդ են տալիս ունենալ ստանդարտ պատասխաններ, որոնք պարզապես պետք է վերաձեւակերպել՝ իրավիճակին համապատասխան:
Ահա մի քանի խորհուրդներ.
Հարցին պատասխանելիս Դուք պարտավորված չեք տեղեկատվություն հաղորդել զրուցակցին: Օրինակ՝ հարցին, թե ինչքան եք վաստակում, կարող եք պատասխանել. «Դե, մեր երկրի միջին աշխատավարձի չափ: Ինչպես շատերը»:
Կարող եք օգտվել «հայելային» մեթոդից: Վերադարձրեք զրուցակցին հարցը եւ այդ ընթացքում ժամանակ շահեք: Կարող եք սկսել, օրինակ «Ճի՞շտ եմ հասկանում, որ… »-ով: Ասենք, «Ճիշտ եմ հասկանում, որ այսօր քո գլխավոր խնդիրն իմ անձնական կյանքն է» կամ «Ճիշտ եմ հասկանում, որ դեմ չէիր լինի, եթե ննջասենյակիս լույսը դու միացնեիր, անջատեիր…»: Ընդ որում, այս նախադասություններն ասել պետք է առանց ավելորդ ժեստերի, հարգալից եւ շատ հանգիստ տոնով:
Զարգացրեք թեման: Ասենք, հարցին, թե չե՞ք պատրաստվում երկրորդ երեխան ունենալ, պատասխանեք. «Իսկ ձեր գործե՞րն ինչպես են, երրորդի մասին չե՞ք մտածում»:
«Մեկ դերասանի թատրոն»: Ոչ ցանկալի հարցը լսելով՝ պատկերացրեք Ձեզ մեր ժամանակների լավագույն դերասանուհին եւ սկսեք… Նայեք զրուցակցի աչքերի մեջ, խոր շունչ քաշեք, հուսահատի դեմք ընդունեք եւ տրագիկ ձայնով ասեք. «Խնդրո՜ւմ եմ քեզ: Լսո՞ւմ ես, երբե՛ք ինձ այդ մասին մի հարցրու, երբե՛ք»: Կամ շատ լուրջ դեմքով եւ ցածր ու խորհրդավոր ձայնով ասեք. «Դա մե՜ծ գաղտնիք է»:
«Ե՞րբ ես ամուսնանում» հարցին, օրինակ, կարելի է պատասխանել այսպես. «Աստղագետներն ասում են՝ երկու սիրող էակների ասցենդները պիտի հանդիպեն, նոր միայն նրանք կայացնեն այդ ճակատագրական որոշումը (միայն թե չհարցնեք՝ ինչ է «ասցենդը». ստեղծագործեք, ինչքան կարող եք վառ երեւակայությամբ, եթե իհարկե գործ չունեք աստղագետի հետ): Եվ երբ գա այդ պահը, եւ ես հասկանամ՝ հանդիպել եմ իմ երկրորդ կեսին, ես նրան կասեմ՝ այո՜: Ոչ մի րոպե չեմ շտապի»:
Եվս մեկ մեթոդ Ձեր դրամապանակը խցկվել ցանկացողներին դիմագրավելու համար: Օրինակ, «Աստված իմ, եւ ի՞նչ արժի այս հաճույքը» զարմանք- հարցին կարող եք պատասխանել. «Օ՜, ստիպված եղա քաղցած մնալ երկու շաբաթ, բայց ինչե՜ր չես անի հանուն նորաձեւության»:
Օգտվեք նաեւ այս ունիվերսալ պատասխաններից՝ «Միշտ զարմացել եմ պատին դեմ տվող հարցեր տալու Ձեր կարողությամբ», «Հաճույքով կպատասխանեմ Ձեր հարցին, միայն թե նախ ասեք՝ ինչու եք այդքան հետաքրքրված»: Կամ ի պատասխան հարցրեք. «Իսկ Դուք իսկապե՞ս այդքան շատ եք ուզում խոսել դրա մասին»: Եթե պատասխանի՝ այո՛, համարձակորեն ասեք. «Իսկ ես՝ ոչ»: Եվ ժպտացեք…
Գրպանում ունեցեք պատրաստի հակադարձումներ անցանկալի իրավիճակներին. չգիտեք՝ ում հետ ստիպված կլինեք շփվել օրվա ընթացքում:
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
