Միզաքարային հիվանդությունը բավական տարածված ու տհաճ խնդիր է, որը կարող է լուրջ հետևանքներ ունենալ, ուստի հարկավոր է անել հնարավոր ամեն բան այս հիվանդության զարգացումից խուսափելու համար։ Երիկամներում քարերի առաջացմանը նպաստող գործոնները կարող են տարբեր լինել, իսկ դրանցից մեկը սննդակարգում սխալ մթերքի գործածությունն է, ուստի սննդակարգը մշտական վերահսկողության տակ պահելը շատ կարևոր է։
Հանրահայտ ռուս բժիշկ Ալեքսանդր Մյասնիկովն անդրադարձել է միզաքարային հիվանդության զարգացման հիմնական պատճառներին՝ նշելով, որ կան սննդամթերքի տեսակներ, որոնք կանխում են քարերի առաջացումը, սակայն կան նաև այնպիսինները, որոնք հակառակ ազդեցությունն են ունենում՝ բարձրացնելով այս հիվանդության զարգացման հավանականությունը։
«Օրինակ՝ կալցիումը։ Եթե դուք ուտում եք կալցիումով հարուստ մթերք, ապա երիկամներում առաջացած քարերը կարող են փոքրանալ, իսկ եթե ընդունում եք կալցիումով դեղահաբեր, ապա դրանք մեծանում են», – նշել է մասնագետը՝ թվարկելով սննդամթերքի այն տեսակները, որոնք բացասաբար են անդրադառնում երիկամների վիճակի վրա։
Աղի մթերք ու թթվեցրած բանջարեղեն. մասնագետը խորհուրդ է տալիս սահմանափակել աղի մթերքի գործածությունը, քանի որ աղի չափազանց մեծ քանակությունը սննդակարգում խթանում է քարերի առաջացումը։
Կենդանական ծագման սպիտակուցներ ու ճարպեր. կենդանական ծագման մթերքը նույնպես բարձրացնում է երիկամներում քարերի առաջացման հավանականությունը, ուստի նման մթերքը ևս հարկավոր է սահմանափակել։
Սպանախ ու կանաչեղեն. բանջարեղենի այս տեսակներն անչափ օգտակար են, սակայն մեծ քանակությամբ օգտագործելու դեպքում այս օգտակար մթերքը նույնպես կարող է դառնալ երիկամներում քարերի առաջացման պատճառ։
Վիտամին С-ով հարուստ մթերք. բժիշկ Մյասնիկովի խոսքով՝ օրգանիզմում այս տարրի մակարդակի բարձրացումը նույնպես նպաստում է երիկամներում քարերի առաջացմանը, ուստի դրանով հարուստ մթերքը չի կարելի չարաշահել։
Որ մթերքն է նվազեցնում միզաքարային հիվանդության զարգացման հավանականությունը
Բժիշկ Մյասնիկովի խոսքով՝ երիկամներում քարերի առաջացման հավանականությունը նվազեցնելու համար խորհուրդ է տրվում հագեցնել սննդակարգը բուսական սպիտակուցներով, օրինակ՝ լոբազգիներով։ Բացի այդ, երիկամային այս ախտաբանությունից պաշտպանվելու համար հարկավոր է հանարավորինս շատ հեղուկ օգտագործել։ Ընդ որում՝ հասարակ ջրից բացի կարելի է նաև թեյ ու սուրճ օգտագործել, սակայն հարկ է հիշել, որ այս ըմպելիքները պետք է լինեն առաջ շաքարի։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
