Ավելորդ քաշը ներկայում բավական տարածված խնդիր է, որի դեմ պայքարի լավագույն միջոցներն են ճիշտ սննդակարգն ու ինտենսիվ մարզումները, սակայն նյութափոխանակության համակարգի դանդաղ աշխատանքի դեպքում անգամ այս միջոցները կարող են բավական չլինել ցանկալի արդյունքին հասնելու համար։ Առհասարակ՝ ինտենսիվ նյութափոխանակությունը քաշի նվազմանը նպաստող գլխավոր գործոններից մեկն է, քանի որ դա այն գործընթացն է, որի միջոցով օրգանիզմը սննդից էներգիա է ստանում։ Սա նշանակում է, որ դանդաղ նյութափոխանակության դեպքում մարդը բավարար էներգիա չի ստանա և չի սպառի, ինչն էլ բարձրացնում է քաշի ավելացման հավանականությունը։
Նման խնդիրներից խուսափելու և ավելորդ քաշից ազատվելու համար հարկավոր է առաջին հերթին հետևել նյութափոխանակության համակարգի ճիշտ աշխատանքին, մինչդեռ շատերն ուշադրություն չեն դարձնում այս փաստին։ Նյութափոխանակությունն օրգանիզմում տեղի ունեցող բոլոր քիմիական գործընթացների ամբողջությունն է, այդ թվում՝ կենսագործունեության համար կարևոր գործառույթների ապահովումը, էներգիայի արտադրությունն ու կուտակում, ինչպես նաև մկանային զանգվածի պահպանումը։ Ակտիվ կամ արագ նյութափոխանակության դեպքում կալորիաներն ավելի արագ են այրվում, ուստի գեղեցիկ ու սլացիկ կազմվածքը պահպանելն ավելի դյուրին է լինում, մինչդեռ դանդաղ նյութափոխանակության դեպքում կալորիաները դանդաղ են վերածվում էներգիայի, ինչն էլ բարձրացնում է ավելորդ քաշի կուտակման հավանականությունը։
Մասնագետների խոսքով՝ գոյություն ունի առնվազն երկու տարածված մթերք, որոնք կարող են դանդաղեցնել նյութափոխանակության համակարգի աշխատանքն ու հանգեցնել ավելորդ կիլոգրամների կուտակման, մինչդեռ մարդիկ շարունակում են օգտագործել դրանք ամենօրյա սննդակարգում։ Դրանք են․
Սպիտակ ալյուրը
Սպիտակ ալյուրը համարվում է լուրջ վերամշակում անցած մթերք, քանի որ դրա պատրաստման ընթացքում ցորենը կորցնում է իր բոլոր օգտակար նյութերը, այդ թվում նաև սննդային մանրաթելերն ու հակաօքսիդանտները, և արդյունքում ալյուրը պահպանում է սննդարար նյութերի միայն չնչին քանակությունը։ Նման մթերքը չափազանց արագ է յուրացվում և օրգանիզմը չի ստանում անհրաժեշտ մարսողական ծանրաբեռնվածությունը, ինչը թույլ չի տալիս նյութափոխանակության համակարգին բավական ակտիվ լինել։
Օմեգա-6 ճարպաթթուները
Բոլորին էլ հայտնի է, որ գոյություն ունեն օմեգա-3 օգտակար ճարպաթթուներ, որոնք պաշտպանիչ ազդեցություն են ունենում սրտամկանի և արյունատար անոթների վրա, սակայն քչերին է հայտնի, որ օմեգա-6 ճարպաթթուների դեպքում պատկերը բոլորովին այլ է։ Ճարպաթթուների այս տեսակով հարուստ են կենդանական ծագման սննդամթերքի տեսակները, այդ թվում՝ միսն ու երշիկեղենը, ինչպես նաև տարատեսակ թխուկներն ու քաղցրավենիքը։ Մասնագետները նախազգուշացնում են, որ չարաշահման դեպքում այս տարրը նպաստում է օրգանիզմում բորբոքումների զարգացմանը, ավելորդ քաշի կուտակմանը, ինսուլինակայունության զարգացմանը և 2-րդ տիպի շաքարային դիաբետի զարգացման հավանականության բարձրացմանը, ուստի դրանով հարուստ մթերքից հարկավոր է հնարավորինս խուսափել։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
