Դաշտանի հետ կապված ամեն ինչ չէ, որ հասկանալի է. պատահում է, երբ այն ժամկետից ավելի երկար է տևում, ինչն անհանգստացնող է։

Բայց երբեմն այն ավարտվում է մեկ օրում և սկսվում են շագանակագույն արտանետումներ, ինչն էլ ավելի վատ է:

Սովորաբար դաշտանը տևում է 3-8 օր, սակայն ցիկլի կանոնավորությունը, ծավալը, ցավը և տեւողությունը կարող են փոխվել ողջ կյանքի ընթացքում։ Որպես կանոն, 18 տարեկանից հետո դաշտանները կարճանում են, ցիկլը՝ կանոնավորվում։ Մինչ այս, դեռահասության շրջանում, առաջին երկու տարիներին դաշտանը կարող է այլ կերպ ընթանալ, քանի որ վերարտադրողական համակարգը միայն կարգավորում է իր աշխատանքը: Իսկ 45 տարին անց դաշտանադադարի սկիզբով (չշփոթել դաշտանադադարի հետ, որի միջին տարիքը 51 տարեկանն է), այն նվաղում է, և ձվազատումը կարող է կրկին անկանոն լինել։ Այդ դեպքում ինչի՞ց է, որ 18-ից 45 տարեկանում դաշտանը կարող է ավարտվել մեկ օրում կամ վատ ընթանալ՝ շագանակագույն արտանետումների տեսքով:

Օվուլյացիայի խանգարում

Եթե ցիկլի ընթացքում ձվաբջիջը չի հասունացել, և ձվազատումը տեղի չի ունեցել, ապա էնդոմետրիումը մնում է բարակ և չի արտանետվում առատ արյունահոսության տեսքով:

Սովորաբար, էնդոմետրիումի հաստությունը մինչև դաշտանի սկիզբը 8-15 մմ է, սակայն գերիշխող ֆոլիկուլի բացակայության դեպքում, որը պետք է ձվաբջիջ արձակի դաշտանային ցիկլի կեսին, էնդոմետրիումը ողջ ցիկլի ընթացքում մնում է բարակ 4-7 մմ (իսկ դա պետք է լինի դաշտանի ավարտից հետո):

Օվուլյացիայի բացակայությունը կարող է պայմանավորված լինել.

• ծանր սթրեսով,
• քնի խանգարմամբ,
• նյարդային հիվանդություններով, դեպրեսիայով,
• արտահայտված ֆիզիկական ակտիվությամբ,
• խիստ դիետաներով, որոնք ուղեկցվում են կարճ ժամանակում քաշի արագ կորստով,
• սպիտակուցներով և խոլեստերինով հարուստ մթերքների բացառմամբ (լյարդ, գառան միս, խոզի միս, թանձր սերուցք (20%), ձողաձուկ, կարագ, ձու), որոնք ստերոիդային (սեռական) հորմոնների համար շինանյութ են:

Ձվարանների ու արգանդի վարակիչ և բորբոքային պրոցեսներ

Սովորաբար դրանք ուղեկցվում են տհաճ ցավով, սակայն որոշ դեպքերում, օրինակ, քրոնիկ էնդոմետիտի դեպքում, ցավը կարող է բացակայել։

Հղիություն

Հղիության ընթացքում պտղի ձվի իմպլանտացիայի ժամանակ կարող է առաջանալ էնդոմետրիումի աննշան անջատում, որը հեշտությամբ կարելի է շփոթել կարճ դաշտանի հետ: Ուստի ավելի լավ է հետազոտություն անցնել, հատկապես, եթե նախորդ ցիկլում անպաշտպան սեռական հարաբերություն եք ունեցել:

Էնդոկրին համակարգի հիվանդություններ

Վահանաձև գեղձի գործունեությունը վերահսկող հորմոնի (TSH) մակարդակի բարձրացումը և հորմոնալ խանգարումները, օրինակ՝ պոլիկիստոզային ձվարանների համախտանիշի դեպքում արական սեռական հորմոնների մակարդակի բարձրացումը կարող է ուղեկցվել արտանետումներով:

Դաշտանադադարի վաղ սկիզբ

Ըստ բժշկական դասակարգման՝ վաղ դաշտանադադարը համարվում է մինչև 45 տարեկանը, ժամանակից շուտը՝ մինչև 40 տարեկանը, և երկու դեպքում էլ գործընթացը սկսվում է դաշտանի նվազմամբ և անկանոն ցիկլով։

Աբորտից հետո

Հղիության արհեստական ընդհատումից հետո մի քանի ամիս, մինչ մարմինը վերականգնվում է, կարող են լինել նվաղ դաշտաններ:

Վիրահատություններ և վնասվածքներ

Որպես կանոն, վերականգնողական շրջանն ուղեկցվում է նաեւ վերարտադրողական համակարգի խախտմամբ եւ վերականգնման համար մի քանի ամիս է պահանջում։

Եզրակացությունը մեկն է՝ բնականոն չէ, եթե դաշտանը մեկ օր է տևում։ Պատճառները կարող են տարբեր լինել, բայց դրանք բոլորն էլ պահանջում են գինեկոլոգի խորհրդատվություն:

Հակաբեղմնավորիչներ ընդունելիս հազվադեպ կամ բացակայող դաշտանները համարվում են հետազոտություն չպահանջող:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ