Լյարդն ամենակարևոր օրգեններից մեկն է, որի գործառույթների խանգարումը կարող է խիստ բացասաբար անդրադառնալ ամբողջ օրգանիզմի վրա, ուստի գաստրոէնտերոլոգ, սննդաբան Նատալյա Պանինան «Известия»-ի հետ զրույցում նշել է այն ախտանշանները, որոնք կօգնեն ժամանակին նկատել խնդիրն ու միջոցներ ձեռնարկել։
Մասնագետի խոսքով՝ լյարդի հետ կապված խնդիրները մեծ մասամբ աննկատ են մնում ու ասիմպտոմ են զարգանում, սակայն արյան հետազոտության արդյունքներում հեպատիտի վիրուսի մարկերների առկայության դեպքում հարկավոր է անհապաղ դիմել մասնագետին, այլապես մեծ է վարակի՝ լյարդի ցիռոզի կամ քաղցկեղի վերածվելու հավանականությունը։
«Եթե անգամ գանգատներ են լինում, ապա, որպես կանոն, դրանց մեծ մասը ոչ սպեցիֆիկ են․ թուլություն, հոգնածություն, ծանրության զգացում ու տհաճ զգացողություններ աջ կողատակում։ Բացի այդ, խնդիրների, երբեմն՝ բավական վտանգավոր խնդիրների մասին կարող են խոսել հետևյալ ախտանշանները․ մաշկին անոթային աստղիկների առաջացում, ափերի կարմրություն, որովայնի չափերի մեծացում, այտուցվածություն», – նշել է բժիշկը։
Նրա խոսքով՝ լյարդի աշխատանքում առկա խնդիրների մասին են հուշում նաև մեզի մուգ գույնը, կղանքի չափազանց բաց գույնը, աղեստամոքսային արյունահոսություններն ու մաշկին հեշտությամբ հեմատոմաների առաջացումը։
Որպես առանձին ախտանշան է դիտարկվում դեղնուկը, որի դեպքում մաշկն ու աչքերի սպիտակուցային թաղանթը դեղնավուն երանգ են ստանում։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ