Լյարդը մարդու ամենակարևոր օրգաններից մեկն է, որի գործառույթների խանգարումը կարող է շատ վտանգավոր հետևանքներ ունենալ՝ խիստ բացասաբար անդրադառնալով ամբողջ օրգանիզմի վրա։ Այս օրգանը պատասխանատու է տոքսինների դուրսբերման, նյութափոխանակության կարգավորման, լեղու արտադրության ու կենսական նշանակություն ունեցող մի շարք այլ գործառույթների կատարման համար, ուստի դրա առողջության պահպանումը ևս կենսական նշանակություն ունի։ Այնուամենայնիվ այս օրգանը մշտապես ենթարկվում է տարատեսակ տոքսինների ու վնասակար նյութերի ազդեցությանը, ինչն էլ դառնում է լուրջ խանգարումների պատճառ։
Նման վտանգավոր խնդիրներից խուսափելու և լյարդի առողջությունը վերականգնելու համար մասնագետները խորհուդ են տալիս կարգավորել կենսակերպը, հրաժարվել վնասակար սովորություններից ու հարստացնել սննդակարգն օգտակար մթերքով, ուստի սննդաբան Մարինա Մակիշան ներկայացրել է այս օրգանի համար ամենաօգտակար համարվող սննդամթերքի տեսակները։
Ինչպես նշել է մասնագետը «Москва 24»-ի հետ զրույցում, այս օրգանի համար շատ կարևոր են համարվում լոլիկի մածուկն ու անյուղ կաթնաշոռը, որոնք նվազեցնում են ալկոհոլի ու անառողջ սննդի վնասակար ազդեցությունն օրգանիզմի վրա։
Մասնագետի խոսքով՝ արագ սնունդը, քաղցրավենիքն ու ալկոհոլը կործանարար ազդեցություն են ունենում այս կարևորագույն նշանակություն ունեցող օրգանի վրա։ Դրանց չարաշահման դեպքում արագ ածխաջրերից ստացած գլյուկոզան անմիջապես հայտնվում է լյարդում և վերածվում ճարպաթթուների։ Օրգանը չի կարող վերամշակել այդ շաքարների մի մասը, ինչն էլ կարող է նպաստել լյարդի ճարպային հիվանդության զարգացմանը։
Այնուամենայիվ, մասնագետը վստահ է, որ լյարդը պաշտպանելու համար հարկավոր է սննդակարգում ընդամենը երկու բաղադրիչ ներառել, որոնք են կաթնաշոռն ու լոլիկի մածուկը։
«Տոմատի մածուկը պարունակում է լիկոպին՝ հակաօքսիդանտ, որը շատ կարևոր է լյարդի բջիջների վորականգնման համար անգամ ալկոհոլի ընդունման դեպքում», – նշել է Մակիշան՝ հավելելով, որ կաթնաշոռն իր հերթին հարուստ է մեթիոնին ամինաթթվով, որն էլ խթանում է նյութափոխանակությունն ու նպաստում է քաշի նվազմանը։ Հենց այս նյութի շնորհիվ էլ տեղի է ունենում լյարդի բջիջների վերականգնումը։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
