Ավելորդ քաշի, անառողջ կենսակերպի, սթրեսի բարձր մակարդակի և ծանր հիվանդությունների նկատմամբ գենետիկական նախատրամադրվածության դեպքում մարդկանց մոտ վաղաժամ մահվան հավանականությունը կտրուկ բարձրանում է։ Այս մասին գրում է «Eat This, Not That!» պարբերականը՝ վկայակոչելով բուժաշխատողներին։
Բժիշկ Սիմա Բոնի խոսքով՝ մարդու սննդակարգի և կյանքի տևողության միջև կա անմիջական կապ։ Այն մարդիկ, որոնց սննդակարգը հարուստ է մեծ քանակությամբ վերամշակում անցած մթերքով ու ալկոհոլով, ավելի հաճախ են բախվում սրտամկանի հիվանդությունների, շաքարային դիաբետի ու քաղցկեղի խնդրին, մինչդեռ հիմնականում մրգերով, բանջարեղենով ու օգտակար սպիտակուցներով սնվող և բավարար քանակությամբ մաքուր ջուր խմող մարդիկ շատ ավելի երկար են ապրում։
Անառողջ սննդակարգից ոչ պակաս վնասակար է մշտական սթրեսը, որը բացասաբար է անդրադառնում սրտամկանի, մարսողական տրակտի և ներզատական համակարգի վրա, ինչպես նաև խանգարում է քնի ցիկլերը։ Սա հանգեցնում է սրտի հիվանդությունների, շաքարային դիաբետի, գրգռված աղու համախտանիշի, աուտաիմունային հիվանդությունների և նեյրոդեգեներատիվ ախտաբանությունների զարգացման, որոնք էլ կարող են դառնալ վաղաժամ մահվան պատճառ։
Ընտանեկան բժիշկ Թոմի Միտչելն իր հերթին հավելում է, որ վաղաժամ մահվան հավանականությունը բարձրացնում են նաև ծխախոտի ու թմրանյութերի գործածությունը, ճարպակալումն ու ռիսկային վարքագիծը, օրինակ՝ անկանոն սեռական կապերը, մեքենա վարելիս անվտանգության կանոններին չհետևելը և այլն։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
