Մեզը նյութափոխանակության արգասիքներից մեկն է և կարող է շատ բան պատմել մարդու առողջական վիճակի մասին, սակայն մարդիկ հազվադեպ են ուշադրություն դարձնում դրան, ինչի հետևանքով էլ առողջական որոշակի խնդիրները չեն նկատում ժամանակին։
Բժիշկ-սննդաբան Զարիետ Օրակովան բացատրել է, թե ինչ ախտաբանական գործընթացների ու հիվանդությունների մասին կարող է հուշել մեզի գույնի փոփոխությունը։
Ինչպես գրել է մասնագետն իր ինստագրամյան էջում, մեզի գույնի փոփոխությունը կախված է լինում դրանում քիմիական միացությունների ու գունանյութերի մակարդակից։ Որպես կանոն առողջ մարդու մեզն ունենում բաց դեղնավուն երանգ, սակայն որոշակի խնդիրների դեպքում այն կարող է փոխել իր գույնը։ Ընդ որում՝ փոփոխության պատճառ կարող է լինել ինչպես անվնաս որևէ գործոն, այդ թվում՝ ջրի գործածությունը, այնպես էլ վտանգավոր խանգարումները։
«Բաց դեղնավուն կամ փափանցիկ մեզը խոսում է օրգանիզմի բավական խոնավեցված լինելու մասին, մինչդեռ մուգ դեղին կամ ոսկեգույն մեզը հուշում է ավելի շատ ջուր խմելու անհրաժեշտության մասին», – նշում է սննդաբանը՝ հավելելով, որ որոշ դեպքերում մեզի գույնի փոփոխությունը կարող է պայմանավորված լինել նաև վտանգավոր հիվանդություններով, ուստի այն չի կարելի անտեսել։
Առողջական ինչ խնդիրներով կարող է պայմանավորված լինել մեզի գույնի փոփոխությունը
Մեզի կարմիր գույն
Մեզը կարմիր երանգ է ստանում, եթե դրանում են հայտնվում թարմ, որևէ փոփոխության չենթարկված էրիթրոցիտներ։ Սա կարող է տեղի ունենալ երիկամների, միզուկի, միազապարկի կամ միզազատական համակարգի այլ օրգանի վնասվածքի հետևանքով, ուստի հարկավոր է շատ զգոն լինել ու անհապաղ բուժզննում անցնել։
Շագանակագույն մեզ
Նման գույնն արդեն հուշում է մեզի մեջ փոփոխության ենթարկված էրիթրոցիտների ի հայտ գալու մասին, ինչը պայմանավորված է լինում կծիկների մեմբրանի վնասվածքով։ Շատ հաճախ նման վնասվածքի պատճառ է դառնում գլոմերուլոնեֆրիտը։
Թափանցիկ մեզ
Այս խանգարումը կարող է հուշել երիկամների կոնտենտրացիոն գործառույթների խանգարման մասին, իսկ այս խանգարումը հանդիպում է շաքարային դիաբետի ու երիկամային անբավարարության դեպքում։
Կաթնագույն մեզ
Սա կարող է շատ վտանագավոր ախտանշան լինել ու հուշել երիկամների աբսցեսի կամ պիելոնեֆրիտի մասին։ Ինչպես նշում է մասնագետը, պղտոր մեզը հուշում է անհապաղ մեզի անալիզ հանձնելու և դրա նստվածքը հետազոտելու անհրաժեշտության մասին։
Միևնույն ժամանակ սննդաբանը նախազգուշացնում է, որ մեզի գույնը կարող է փոխվել նաև որոշակի դեղորայքի ընդունման դեպքում, ուստի խուճապի մատնվելու կարիք չկա։ Այս դեպքում գույնը պայմանավորված է լինում դեղամիջոցի յուրացման հետևանքով օրգանիզմում հայտնված տարրերի՝ երիկամների կոզմից վերամշակվելու գործընթացով։ Օրինակ՝ ասպիրինի մեծ չափաբաժինը կարող է հանգեցնել մեզի վարդագույն երանգի, մինչդեռ ամիդոպիրին ու ռիֆամպիցին դեղորայքի գործածությունը կարող է դառնալ կարմիր մեզի պատճառ։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ