![](https://znews.am/wp-content/uploads/2024/06/your_custom_beautiful_quotes_here-33-504x270.png)
Առողջական խնդիրների դեպքում օրգանիզմը սովորաբար փորձում է հուշել դրանց մասին ախտանշանների միջոցով:
Հաճախ այդ ախտանշանները խիստ վտանգավոր չեն լինում, սակայն երբեմն լինում են նաև այնպիսինները, որոնց առկայության դեպքում հարկավոր է անպայման դիմել բժշկին և անհապաղ բուժզննում անցնել:
Ձեր ուշադրությանն ենք ներկայացնում 7 ախտանշան, որոնք ոչ մի դեպքում չի կարելի անուշադրության մատնել, քանի որ դրանք կարող են պայմանավորված լինել խիստ վտանգավոր հիվանդություններով:
1. Ցավ որովայնի հատվածում, որն ի հայտ է գալիս կտրուկ և չի մեղմվում օրեր շարունակ
Նման ցավի ժամանակ ոչ մի դեպքում չի կարելի զբաղվել ինքնաբուժությամբ, քանի որ այն կարող է պայմանավորված լինել առողջական լուրջ խնդրով: Ուժգին ցավը կարող է վկայել այնպիսի լուրջ հիվանդությունների մասին, ինչպիսին են որդանման ելունի բորբոքումը, ադնեքսիտը (ձվարանների և արգանդի հավելումների բորբոքում), արտարգանդային հղիությունը կամ ձվարանի կիստայի պատռվածքը: Նման դեպքերում հիվանդին հարկավոր է շտապ բուժօգնություն, քանի որ հետևանքները կարող են շատ լուրջ լինել:
2. Քաշի կտրուկ փոփոխություն
Եթե մարդու քաշը սկսում է նվազել, սակայն նրա սննդակարգն ու ֆիզիկական ակտիվությունը չեն փոխվել, ապա հարկավոր է անհապաղ բուժզննում անցնել: Քաշի նվազումը կարող է պայմանավորված լինել թիրեոտոքսիկոզով, որի դեպքում վահանաձև գեղձը չափազանց շատ հորմոն է արտադրում: Երբեմն էլ քաշի նվազումը վկայում է երկարատև սթրեսի մասին, որը վերածվել է նյարդային խանգարման: Նման դեպքերում հարկավոր է անպայման խորհրդակցել հոգեբույժի հետ: Բացի այդ, հարկ է հիշել, որ քաշի կտրուկ նվազումը կարող է լինել օնկոլոգիական հիվանդության ախտանշան, ուստի այն ոչ մի դեպքում չի կարելի անուշադրության մատնել:
Խիստ վտանգավոր կարող է լինել նաև քաշի ավելացումը: Սա կարող է պայմանավորված լինել հիպոթիրեոզով՝ վահանաձև գեղձի թերֆունկցիայով, ինչը խիստ վտանգավոր է:
3. Դեմքի, ձեռքերի ու ոտքերի այտուցվածություն
Նման այտուցները կարող են հուշել երիկամների կամ սրտամկանի հետ կապված խնդիրների մասին: Առավոտյան դեմքի այտուցվածությունը հաճախ անվտանգ է լինում, սակայն մասնագետները նշում են, որ անգամ այս դեպքում հարկավոր է շատ զգույշ լինել: Բացի այդ, եթե այտուցվում է միայն դեմքը, ապա խորհուրդ է տրվում ուշադրություն դարձնել կոսմետիկ միջոցներին, քանի որ դրանք նույնպես կարող են նպաստել հեղուկի կուտակմանը:
4. Գլխացավեր
Եթե մարդը երբեք չի ունեցել գլխացավերի խնդիր, սակայն վերջին շրջանում պարբերաբար բախվում է դրանց, ապա պետք է անհապաղ խորհրդակցի բժշկի հետ: Եթե գլխացավերը պարբերաբար են ի հայտ գալիս, ապա անհանգստացնող ազդանշան պետք է լինի դրանց ուժգնացումը: Նման խնդիրը կարող է պայմանավորված լինել սթրեսով, սակայն այն կարող է վկայել նաև զարկերակային ճնշման բարձրացման մասին: Այս դեպքում միայն մասնագետը կարող է պարզել գլխացավի առաջացման պատճառն ու նշանակել անհրաժեշտ բուժումը:
5. Պնդացումներ կրծքագեղձերի հատվածում
Նման պնդացումներն ու կրծքի մեծացումը բնական երևույթ են և հաճախ են նկատվում դաշտանային ցիկլի երկրորդ փուլում, սակայն եթե դրա հետ մեկտեղ նկատվում են նաև ցավեր ու տհաճ զգացողություններ, ապա հարկավոր է դիմել բժշկին: Նման ախտանշանը կարող է պայմանավորված լինել հորմոնալ դիսբալանսով կամ մաստոպաթիայով, ուստի այն ոչ մի դեպքում չի կարելի անտեսել:
6. Հեշտոցային արտասովոր արտադրություն
Հեշտոցային արտադրության տհաճ հոտի, գույնի փոփոխության կամ դրանում արյան հետքերի առկայության դեպքում անհրաժեշտ է անպայման գինեկոլոգիական բուժզննում անցնել: Տհաճ հոտը վկայում է հեշտոցի միկրոֆլորայի դիսբակտերիոզի մասին, իսկ արյան հետքերը կարող են պայմանավորված լինել վերարտադրողական համակարգի օրգանների հետ կապված խանգարումներով, ուստի հարկավոր է շատ ուշադիր լինել:
7. Այրոց ու քոր սեռական օրգանների հատվածում
Այս ախտանշաններն ամենից հաճախ պայմանավորված են լինում սնկային հիվանդություններով, իսկ սեռական օրգանների հատվածում սնկերի աճը կարող են խթանել ինչպես սթրեսը, այնպես էլ քաղցրի չարաշահումը: Բացի այդ, հաճախ քորը պայմանավորված է լինում մակաբույծներով, ուստի հարկավոր է պարբերաբար բուժզննում անցնել և հետևել անձնական հիգիենայի կանոններին:
Նյութը հրապարակման պատրաստեց zNews-ը
Կիսվե՛ք Ձեր ընկերների հետ