Շոկոլադի սիրահարների կյանքն այդքան էլ քաղցր չէ․ ոմանք ասում են, թե դա առողջությանը վնաս է, մյուսներն էլ պնդում են, որ առանց քաղցրով սնուցման՝ ուղեղն ավելի դանդաղ է գործում:

Այս քաղցրավենիքի նկատմամբ բանավեճերը շատ են:

Եկեք պարզենք, թե ինչ օգտակար հատկություններ ունի շոկոլադը և արդյո՞ք կարելի է այն ուտել ամեն օր:

Ո՞ր շոկոլադն է ավելի օգտակար

Ցանկացած շոկոլադե սալիկ չէ, որ կարելի է իսկապես օգտակար համարել: Առավելագույն օգտակար հատկություններ ունի մուգ շոկոլադը, որը բաղկացած է առնվազն 65% կակաոյից և լրացուցիչ բաղադրիչներ քիչ է պարունակում:

Կաթնային շոկոլադը նույնպես, ընդհանուր առմամբ, լավ է, բայց ավելի փոքր չափով, քանի որ դրանում չկա ամենաառողջ բաղադրիչը՝ կակաոն: Իսկ, ահա, սպիտակ շոկոլադը դժվար, թե կարելի է առողջարար քաղցրավենիք անվանել. այն հիմնականում բաղկացած է շաքարից և կարագից, մինչդեռ այնտեղ շատ քիչ կակաոյի փոշի կա:

Ուղեղային գրոհ

Frontiers in Nutrition ամսագրում հրապարակված հետազոտության համաձայն, ֆլավանոլները՝ կակաոյի բուսական քիմիական նյութերը, իրականում օգտակար են ուղեղի համար: Դրանք պաշտպանում են հիշողության և ուշադրության համար պատասխանատու հատվածները, ինչպես նաև մտավոր գործունեության արագությունը:

Գիտնականները կարծում են, որ շոկոլադը դրական է անդրադառնում ուղեղի աշխատանքին’ սրտի վրա իր ազդեցության միջոցով. այն օգնում է ապահովել արյան բնականոն հոսք, նվազեցնում արյան մակարդելիությունը և կարգավորում ճնշումը: Սա, իր հերթին, մեծացնում է արյան հոսքը դեպի ուղեղ:

Օգնություն սրտին

Սև շոկոլադի մեջ պարունակվող ճարպերի մեծ մասը «լավն» են՝ միահագեցած ճարպեր և ստեարաթթու: Դրանք դրական ազդեցություն ունեն սրտի վրա: Մինչդեռ կաթնային շոկոլադը կարող է պարունակել հավելումներ, որոնք դժվար է օգտակար համարել, օրինակ՝ տրանս ճարպերը: Գնելուց առաջ արժե ստուգել բաղադրությունը՝ համոզվելու համար, որ ավելացված յուղեր չկան: Բարձրորակ և «ճիշտ» շոկոլադը կակաոյի կարագից բացի այլ բան չպետք է պարունակի:

Մրգային և կոնֆետների հավելումները մեծացնում են շոկոլադի կալորիականությունը և նվազեցնում առողջության համար դրա օգտակար հատկությունները: Նույնիսկ սովորական չորացված մրգերը բարձրացնում են շաքարի մակարդակը քաղցրավենիքի մեջ և վնասում սրտին: Մյուս կողմից, ընկույզեղենը, ինչպիսիք են նուշը կամ հնդկական ընկույզը, օգտակար են սրտի համար և, ընդհակառակը, կարող են ուժեղացնել դրական ազդեցությունը:

Վերջին ուսումնասիրությունները ցույց են տալիս, որ շոկոլադի կանոնավոր օգտագործումը կարող է նվազեցնել սրտամետաբոլիկ խանգարումների ռիսկը: Ենթադրվում է, որ այս քաղցրավենիքի սիրահարների մոտ սրտանոթային հիվանդությունների զարգացման ռիսկը մեկ երրորդով պակաս է:

Մեկ այլ ուսումնասիրության համաձայն՝ շաբաթական երկու կամ ավելի անգամ շոկոլադ ուտելը կարող է 32% -ով նվազեցնել կալցիֆիկացիայի (զարկերակներում կալցիֆիկացիոն գոյացությունների առաջացում) ռիսկը: Բացի այդ, շաբաթական ավելի քան 5 անգամ սեւ շոկոլադ ուտելը 57% -ով իջեցնում է սրտի հիվանդության ռիսկը:

Կարելի՞ է ամեն օր շոկոլադ ուտել

Չնայած շոկոլադը որոշ դեպքերում կարող է օգտակար լինել, դա չի նշանակում, որ նախաճաշը պետք է փոխարինել քաղցր սալիկներով: Այն պարունակում է մեծ քանակությամբ ճարպեր (32,5 գ՝ 100 գ-ի մեջ) և շատ կալորիաներ (543 կկալ՝ 100 գ-ի մեջ): Շոկոլադ պետք է ուտել չափավոր, փորձեք նվազեցնել չափաբաժնիները և սահմանափակվել օրական մեկ սալիկով: Բարեբախտաբար, մուգ շոկոլադն այնքան հագեցնող է, որ դուք, հավանաբար, չեք ցանկանա գերազանցել առաջարկվող չափաբաժինը։

Նյութը հրապարակման պատրաստեց zNews-ը

Կիսվե՛ք Ձեր ընկերների հետ