Սեռական առողջությունը մարդու ընդհանուր առողջության բաղկացուցիչ մասն է, և սեռապես առողջ անհատն է ունակ վարելու լիարժեք ու ներդաշնակ սեռական կյանք:

Ծխախոտամոլությունը, ալկոհոլամոլությունը, թմրանյութերը խիստ բացասական ազդեցություն են գործում սեռական առողջության վրա:

«Մեկ գլանակ ծխախոտի դեպքում սեռական օրգանների անոթները 30 րոպե սեղմվում են և արյան շրջանառությունը վատանում է, որը լուրջ խնդիր է ինչպես սեքսուալ առումով, անպես էլ ազդում է վերարտադրողական առողջության վրա: Ալկոհոլի ամենօրյա չարաշահումը ևս առաջ է բերում ռեպրոդուկտիվ խնդիրներ, հանգեցնում արական սեռական հորմոնի նվազմանը, կանանց մոտ պատճառ դառնում դաշտանային խանգարումների, առաջացնում ցանկության նվազում և այլն»,- բացատրում է սեքսապաթոլոգ Սևադա Հակոբյանը:

Առողջ ապրելակերպին հետևելը պարտադիր է:

Դա ենթադրում է ճիշտ ու առողջ սննդակարգ՝ միկրոտարրերով և վիտամիններով հարուստ, ճարպոտ սննդի կրճատում, չափավորում:

Պետք է այնպես անել, որ ճարպակալում ու ավելորդ քաշ չառաջանա:

Նստակյաց կյանքից ևս պետք է խուսափել:

Հենց այս կենսակերպն է, որ կարող է ապահովել նորմալ սեռական կյանքի հնարավորությունը:

Հիշենք նաև, որ առողջ երեխա ունենալու նախապայմաններից մեկն էլ պլանավորումից առաջ բացարձակապես առողջ կենսակերպի անցումն է:

Իմիջայլոց, ավագ տարիքում վերականգնման պրոցեսն ավելի դժվար է տեղի ունենում, քան երիտասարդ տարիքում:

Հետևաբար պետք չէ կորցնել երիտասարդ տարիքում առողջ լինելու հնարավորությունը:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ