Սրտանոթային համակարգի հիվանդությունները համարվում են վաղաժամ մահվան հիմնական պատճառներից մեկը, ուստի այս հիվանդությունների ախտանշաններն իմանալը կենսական նշանակություն ունի յուրաքանչյուրի համար: Հատկապես վտանգավոր է սրտամկանի ինֆարկտը, որի դեպքում ժամանակին միջոցներ չձեռնարկելը կարող է ճակատագրական լինել:
Սրտամկանի «դասական» ինֆարկտը, որպես կանոն, դրսևորվում է կրծքավանդակի սուր ցավերով և ճնշման զգացողությամբ, մինչդեռ «լուռ» կաթվածների դեպքում ախտանշանները հաճախ այնքան անհասկանալի ու ատիպիկ են լինում, որ մարդիկ դրանք երբեմն անգամ չեն նկատում։
German Heart Foundation-ի ղեկավարներից մեկը՝ Թոմաս ֆոյգթլենդերը Focus պարբերականի հետ զրույցում բացատրել է, ինչու սրտամկանի «լուռ» ինֆարկտի դեպքում մարդիկ հաճախ չեն գիտակցում, թե ինչ է կատարվում։
«Սովորաբար դրանք թեթև ընթացք են ունենում, իսկ այնպիսի ախտանշանները, ինչպիսին են գլխապտույտները, թուլությունը, ինքնազգացողության վատթարացումն ու հոգնածությունն այնքան ատիպիկ են լինում, որ հիվանդները դրանց ուշադրություն անգամ չեն դարձնում», – բացատրում է մասնագետը։
Եթե սրտամկանի «լուռ» ինֆարկտը ժամանակին հայտնաբերել չի հաջողվում, ապա ընթացիկ պրոֆիլակտիկ բուժզննումները թույլ կտան պարզել՝ կան արդյոք վնասվածքներ սրտամկանի ինֆարկտի հետևանքով։ Նման «լուռ» ինֆարկտների հետևանքները կարող են շատ վտանգավոր լինել։ Դրանք կարող են հանգեցնել «իրական» ինֆարկտի, որն էլ կարող է մահվան ելք ունենալ։ Ավելին՝ սրտամկանի «լուռ» ինֆարկտից ընդամենը չորս տարի անց մահվան վտանգը հիվանդի մոտ բարձրանում է 60 տոկոսով, ուստի այն ժամանակին հայտնաբերելը և հետագայում միջոցներ ձեռնարկելը շատ կարևոր է։
Թոմաս ֆոյգթլենդերի խոսքով՝ գոյություն ունի սրտի նոպայի հավանականությունը բարձրացնող հինգ գործոն, որոնք են ծխախոտի գործածությունը զարկերակային բարձր ճնշումը, շաքարային դիաբետը, խոլեստերինի բարձր մակարդակը կամ գենետիկական նախատրամադրվածությունը։ Վերոնշյալ ռիսկային գործոններից մեկի կամ մի քանիսի առկայության դեպքում հարկավոր է անպայման մանրակրկիտ հետազոտություն անցնել։ Եթե դրանցից ոչ մեկն առկա չէ, ապա մեծ է հավանականությունը, որ մարդը երբևէ չի բախվի ոչ սրտամկանի «լուռ» ինֆարկտի, ոչ ախտանշաններով դրսևորվող ինֆարկտի խնդրին։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
