Սիսեռը բավական տարածված մթերք է, որը կիրառվում է ամենատարբեր ուտեստների պատրաստման համար, սակայն այս մթերքը ոչ միայն համեղ է, այլև անչափ օգտակար, ինչը քչերին է հայտնի։ Ավելին՝ այն հատկապես օգտակար է ավելորդ քաշի դեմ պայքարում, քանի որ օգնում է շատ ավելի արագ հասնել ցանկալի արդյունքին։
Բժիշկ-սննդաբան Սիդնեյ Լապպեի խոսքով՝ սիսեռը հարուստ է մեծ քանակությամբ վիտամիններով ու հանքանյութերով, այդ թվում՝ B խմբի վիտամիններով, երկաթով, ֆոսֆորով և մագնեզիումով, որոնք շատ կարևոր են օրգանիզմի համար, ուստի այն սննդակարգում ներառելը կարող է շատ օգտակար լինել։ Սակայն այն հարուստ է նաև այլ սննդարար նյութերով, որոնք ոչ պակաս կարևոր են։
Ձեր ուշադրությանն ենք ներկայացնում այս մթերքի ամենաօգտակար հատկություններն ու երեք պատճառ այն սննդակարգում ներառելու համար։
Պարունակում է մանրաթելեր
Սիսեռի մի բաժինը պարունակում է մոտ 10 գրամ մանրաթելեր, որոնք կարգավորում են արյան մեջ շաքարի մակարդակը և ճնշում են քաղցը, ինչը շատ կարևոր է քաշը վերահսկողության տակ պահելու համար։ Լապպեի խոսքով՝ սիսեռը պարունակում է լուծվող մանրաթելեր, որոնք նպաստում են առողջարար աղիքային բակտերիաների զարգացմանն ու օգնում են պահպանել առողջ քաշը։
«Չնայած այս կապն այդքան էլ պարզ չէ, այնուամենայնիվ որոշ տվյալներ վկայում են, որ աղիքային միկրոբիոմի բազմազանության դեպքում մարդկանց մոտ վնասակար սննդային սովորությունների ձևավորման ու որովայնի հատվածում ճարպաշերտերի կուտակման վտանգն ավելի ցածր է լինում», – նշել է մասնագետը։
Հարուստ է սպիտակուցներով
Սիսեռի, քինոայի կամ սոյայի մեջ պարունակվող բուսական ծագման սպիտակուցների գործածությունն օգնում է պահպանել հագեցածության զգացումն ու նվազեցնել բարձր կալորիականություն ունեցող սննդամթերք օգտագործելու ցանկությունը։
«Որոշ հետազոտություններ ցույց են տվել, որ լոբին ու բուսական սպիտակուցներով հարուստ այլ լոբազգիներն ավելի արագ ու լավ են հագեցնում՝ ի տարբերություն, խոզի մսից կամ հորթի մսից ստացված կենդանական սպիտակուցների», – նշել է Լապպեն։
Պարունակում է օգտակար օսլա
Տարատեսակ վնասակար սոուսները հումուսով փոխարինելը կարող է շատ ավելի օգտակար լինել, ինչը պայմանավորված է դրանում պարունակվող ամիլոզա օսլայով։ Օրգանիզմն այն շատ ավելի դանդաղ է յուրացնում, ինչի շնորհիվ հագեցածության զգացումը պահպանվում է շատ ավելի երկար ժամանակ։ Լապպեի խոսքով՝ սա հատկապես օգտակար է շաքարային դիաբետով հիվանդների համար, քանի որ ամիլոզան կանխում է արյան մեջ շաքարի մակարդակի անսպասելի տատանումները։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
