Շաքարային դիաբետը ներկայում ամենատարածված հիվանդություններից մեկն է: Ընդ որում՝ պաշտոնական վիճակագրական տվյալներն իրականում շատ են տարբերվում իրական թվերից, քանի որ աշխարհում միլիոնավոր մարդիկ նույնիսկ գլխի չեն ընկնում, որ տառապում են շաքարային դիաբետից: Ուսումնասիրությունները ցույց են տվել, որ, հաշվի առնելով հիվանդության տարածման արագությունը, 2025 թվականին հիվանդների թիվը կկրկնապատկվի:

Հարկ է հիշել, որ շաքարային դիաբետը չվերահսկելու դեպքում արյան մեջ շաքարի մակարդակը կարող է բարձրանալ, ինչն էլ բացասաբար է ազդում օրգանիզմի շատ համակարգերի (հատկապես՝ նյարդային ու սրտանոթային համակարգերի) աշխատանքի վրա, ուստի ստորև ներկայացված ախտանշանների առկայության դեպքում հարկավոր է անմիջապես դիմել բժկին:

1.Մշտական ծարավի զգացում ու հաճախամիզություն

Սա շաքարային դիաբետի 2-րդ տիպին հատուկ ամենատարածված ախտանշաններն են, որի դեպքում բժշկի հետ խորհրդակցելը խիստ անհրաժեշտ է: Բնական է, որ շատ խմելու դեպքում մարդը շատ էլ միզում է, սակայն եթե նա մեկ գիշերվա ընթացքում մի քանի անգամ միզելու ցանկություն է ունենում, նշանակում է նրա երիկամներն ավելի ինտենսիվ են աշխատում՝ ավելորդ գլյուկոզան օրգանիզմից դուրս բերելու համար: Հենց սա է պատճառը, որ մարդուն անընդատ տանջում է անհագ ծարավի զգացումը:

Ի դեպ՝ այս հիվանդության դեպքում հաճախ նկատվում է նաև անբացատրելի քաշի կորուստ, որը պայմանավորված է լինում նրանով, որ ինսուլինը չի կարողանում գլյուկոզան հասցնել բջիջներին, ինչի պատճառով դրանք սկսում են քայքայել սպիտակուցները:

 2. Քաղցի զգացողություն

Ախորժակի կտրուկ բարելավումը (հատկապես՝ քացր ուտելու ցանկությունը) քաշի կորստի ֆոնին հաճախ պայմանավորված է լինում շաքարային դիաբետով ու արյան մեջ շաքարի մակարդակի կտրուկ տատանումներով, սակայն կանանց մոտ նման փոփոխությունները կարող են նկատվել նաև դաշտանային ցիկլի տարբեր փուլերում:

3. Հոգնածությունն ու դյուրագրգիռությունը

Շաքարային դիաբետի դեպքում կարող են նկատվել նաև տրամադրության տատանումներ, քանի որ քնի խանգարումները, շաքարի մակարդակի կտրուկ տատանումներն ու հաճախամիզությունը բացասաբար են ազդում մարդու հոգեկան առողջության վրա:

4. Թմրածություն ու ծակծկոց

Սա վկայում է այն մասին, որ հիվանդությունն ախտահարել է նյարդերը: Նույն կերպ կարող են առաջանալ նաև մկանային ցավեր: Եթե ախտանշանները համեմատաբար վերջերս են ի հայտ եկել, ապա այս խնդրից կարելի է ազատվել՝ ժամանակին բուժում սկսելու դեպքում: Հարկ է նաև նշել, որ բուժման հիմնական մասը պետք է կազմի ճիշտ դիետան:

5. Մաշկային խնդիրներ

2-րդ տիպի շաքարային դիաբետի դեպքում խանգարվում է մաշկի բջիջների սնուցումը, ինչի հետևանքով ի հայտ են գալիս մուգ հետքեր, առաջանում է չորություն, քոր, գրգռվածություն ու գունատություն:

6. Վերքերի ու հիվանդությունների դանդաղ ապաքինում 

Արյան մեջ շաքարի բարձր մակարդակի պատճառով խանգարվում է արյան շրջանառությունը, ինչն էլ հանգեցնում վերքերի դանդաղ ապաքինման: Բացի այդ, այս հիվանդությունը ենթադրում է նաև հիվանդությունների դանդաղ ապաքինում:

7. Սնկային վարակներ

Արյան մեջ շաքարի բարձր մակարդակի պատճառով 2-րդ տիպի շաքարային դիաբետով տառապող մարդկանց մոտ սնկային վարակներն ավելի հաճախ են հանդիպում: Բացի այդ, այս հիվանդները ավելի խոցելի են միզասեռական համակարգի վարակների նկատմամբ:

8. Տեսողության ու լսողության խանգարումներ

Համարվում է, որ շաքարային դիաբետի հետևանքով մարդու տեսողությունը վատանում է, սակայն հիվանդներից շատերի հավաստմամբ՝ արյան մեջ շաքարի բարձր մակարդակը նպաստում է նրանց տեսողության բարելավմանը, իսկ բուժումը՝ վատացմանը:

Ամեն դեպքում ուսումնասիրությունները ցույց են տվել, որ շաքարային դիաբետի դեպքում կարող է վատանալ արյան շրջանառությունն ու աչքի սնուցումը, ինչն էլ հանգեցնում է տեսողության վատացման:

Լսողության վատացումը նույնպես կարող է լինել շաքարի բարձր մակարդակի հետևանքով, քանի որ այս դեպքում վնասվում են ներքին ականջի արյունատար անոթներն ու նյարդերը:

Հարկ է նաև նշել, որ շաքարային դիաբետը ժամանակին ախտորոշելու համար, անհրաժեշտ է շատ ուշադիր լինել օրգանիզմի տված ազդանշանների նկատմամբ և ցանկացած խանգարման դեպքում խորհրդակցել բժշկի հետ ու անցնել անհրաժեշտ բուժզննումը:

Նյութը հրապարակման պատրաստեց zNews-ը

Կիսվե՛ք Ձեր ընկերների հետ