Խաչածաղկավորների ընտանիքին պատկանող բանջարեղենի անսահմանափակ գործածությունը կարող է վնասակար լինել կանանց առողջության համար՝ հանգեցնելով վահանագեղձի աշխատանքի հետ կապված մի շարք քրոնիկ հիվանդությունների սրման։ Այս մասին հաղորդում է «Վեչերնյայա Մոսկվան»՝ վկայակոչելով սննդաբան Ելենա Սոլոմատինային։ Մասնագետի խոսքով՝ բանջարեղենի նման տեսակների շարքին են դասվում բրոկոլին, կաղամբը, շաղգամը, բողկը, ծովաբողկը, տերևավոր մանանեխը և այլն։
«Ամբողջական ցանկը կարելի է գտնել համացանցում։ Բանն այն է, որ սննդամթերքի այդ տեսակները պարունակում են իզոտիոցիանատներ, որոնք ճնշում են հորմոնների արտադրությունն ու սրում հիպոթիրեոզը՝ ներզատական համակարգի հիվանդությունը, որը բնորոշվում է վահանագեղձի հորմոնների պակասով», – նշել է Սոլոմատինան։
Բանջարեղենի այս տեսակներից բացի, կանանց օրգանիզմի համար վնասակար կարող է լինել նաև սոյան։ Բժշկի խոսքով՝ չնայած, որ այս մթերքը խթանում է կանանց սեռական հորմոնի՝ էստրոգենի արտադրությունը, այն միևնույն ժամանակ դանդաղեցնում է վահանագեղձի հորմոնների սինթեզը։
Ըստ Սոլոմատինայի՝ առողջական խնդիրներից խուսափելու համար վերոնշյալ սննդամթերքի տեսակների գործածությունը հարկավոր է նվազեցնել, սակայն միևնույն ժամանակ մասնագետը նաև շեշտել է, որ լուրջ խնդիրների առաջացումը հնարավոր է միայն նման մթերքը կանոնավոր ու մեծ քանակությամբ օգտագործելու դեպքում, մինչդեռ չափավոր գործածության ու ճիշտ կազմված սննդակարգի դեպքում նման խնդրի հավանականությունը ցածր է։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
