Բարձր յուղայնությամբ մթերքը սովորաբար համարվում է վնասակար առողջության համար, սակայն մասնագետները վստահ են, որ ճարպերը ոչ միշտ են վտանգավոր։
Անգամ կենդանական ծագման ճարպերը երբեմն կարող են բավական օգտակար լինել, ուստի որոշակի քանակությամբ պետք է ներառված լինեն սննդակարգում։
Ճարպից լիովին հրաժարվել ոչ մի դեպքում չի կարելի, քանի որ այն էներգիայի աղբյուր է, ուժ է տալիս ֆիզիկական ու մտավոր գործունեության համար, ինչպես նաև նպաստում է կենսական նշանակություն ունեցող ճարպալույծ նյութերի, մասնավորապես՝ սպիտակուցների, ճարպերի, ածխաջրերի ու էլեկտրոլիտների փոխանակության ու բջիջների ճիշտ աշխատանքի համար անհրաժեշտ A, D, E, K վիտամինների յուրացմանը։
Ճարպերը սննդակարգից բացառելը կարող է առողջական բազմաթիվ լուրջ խնդիրների պատճառ դառնալ, ուստի medikforum.ru կայքը ներկայացրել է բարձր յուղայնություն ունեցող մի քանի մթերք, որոնք անչափ օգտակար են օրգանիզմի համար և իրենց առողջարար բաղադրության շնորհիվ չափավոր գործածության դեպքում չեն առաջացնի առողջական խնդիրներ։
Յուղոտ ձկնատեսակներ
Յուղոտ ձկնատեսակները հագեցնում են օրգանիզմն օմեգա-3 ճարպաթթուներով, ինչի շնորհիվ բարելավվում է անոթային համակարգի վիճակն ու կոգնիտիվ առողջությունը։
Ավոկադո
Ավոկադոն հարուստ է ոչ միայն օգտակար ճարպաթթուներով, այլև սպիտակուցներով ու հակաօքսիդանտներով։ Այն ունի անչափ օգտակար բաղադրություն, ինչի շնորհիվ պաշտպանում է բորբոքումներից։
Պանիր
Պանիրը ևս ունի բարձր յուղայնություն, սակայն այն կալցիումի ու պրոբիոտիկների հիանալի աղբյուր է։ Հատկապես օգտակար են պանրի պինդ տեսակները՝ պարմեզանը, մոցարելան, չեդերը և այլն։
Ընկույզներ
Ընկույզները ևս հարուստ են օմեգա-3 ճարպաթթուներով։ Բացի այդ, դրանք պարունակում են նաև մեծ քանակությամբ սպիտակուցներ ու մանրաթելեր։ Օրական մի բուռ ընկույզ ուտելը համարվում է արյան մեջ շաքարի մակարդակը կայուն պահելու հիանալի միջոց, սակայն հարկ է հիշել, որ այս մթերքը ոչ մի դեպքում չի կարելի չարաշահել։
Յոգուրտ
Հետազոտությունները ցույց են տվել, որ նորմալ յուղայնությամբ յոգուրտի կանոնավոր գործածությունը կարող է օգնել բարելավել սրտանոթային համակարգի վիճակն ու նպաստել քաշի ճիշտ վերահսկմանը։ Բացի այդ, այս մթերքը պրոբիոտիկների հարուստ աղբյուր է, ուստի շատ օգտակար է նաև աղիների համար։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
