Քթի փակվածությունը կարող է լինել վտանգավոր հիվանդության մասին հուշող ախտանշան։ Այս մասին, ինչպես գրում է «Վեչերնյայա Մոսկվա»-ն («Вечерняя Москва»), ասել է բժիշկ-օտորինոլարինգոլոգ (քիթկոկորդականջաբան), Սեչենովի անվան Մոսկվայի պետական բժշկական համալսարանի պրոֆեսոր Յուրի Ուլյանովը։
Մասնագետի խոսքով՝ մարդու քիթը նախատեսված է օդը խոնավացնելու ու տաքացնելու համար, ինչով էլ պայմանավորված է քթի խոռոչների առկայությունը։ Սակայն քթի փակվածության դեպքում խոռոչներն ինչպես հարկն է չեն շնչում, ինչը կարող է նշանակել, որ քթի խոռոչներում բորբոքային գործընթացներ են զարգանում, որոնք երբեմն հանգեցնում են սինուսիտի առաջացման։
Ինչպես բացատրել է բժիշկը, սինուսիտի վտանգներից մեկն այն է, որ բորբոքման դեպքում խոռոչները փակվում են, ինչի հետևանքով բորբոքային գործընթացը կարող է ախտահարել նաև աչքերը՝ գրգռելով հյուսվածքներն ու առաջացնելով գլխացավեր։
Ավելին՝ Ուլյանովն ընդգծել է, որ բորբոքային գործընթացը կարող է հասնել նաև գլխուղեղին, իսկ այս դեպքում հարկավոր է անհապաղ բուժօգնություն ցուցաբերել հիվանդի կյանքը փրկելու համար։ Միևնույն ժամանակ մասնագետը նաև շեշտել է, որ գլխացավերը պայմանավորված են լինում քթի խոռոչների վիճակով, քանի որ դրանք զբաղեցնում են գլխի զգալի մասը։
Նյութը հրապարակման պատրաստեց zNews-ը
Կիսվե՛ք Ձեր ընկերների հետ
